Ижтимоий тармоқларда Андижон вилояти Пахтаобод туманида фуқаронинг Ички ишлар органи ходимлари ноқонуний тарзда ушлаб турилгани юзасидан қилинган мурожаат эълон қилинди. Вилоят Ички ишлар бошқармаси ҳолатга муносабат билдирди.
Қайд этилишича, видеомурожаатда қамоққа олингани айтилган Х.А. (1986 йилда туғилган) томонидан 2021 йилда 3 та МЧЖ ташкил этилган. Улар таъминотчи сифатида «Аёллар дафтари» ва «Ёшлар дафтари» рўйхатларида турувчи 46 нафар фуқаро билан чеварчилик, асаларичилик ҳамда бошқа йўналишларда маҳсулот етказиб бериш тўғрисида шартнома тузган. Бу орқали «Микрокредит банк», «Халқ банки» ва «Агробанк» Пахтаобод филиаллари томонидан жами 1 миллиард 242 миллион сўм кредит маблағлари ушбу МЧЖларга ўтказилган.
Бироқ Х.А. келиб тушган пул маблағлари ноқонуний нақдлаштириб, кредит таъминоти эгаларига етказиб бермасдан, таъминот маҳсулотларини бозор нархидан 2—3 баробар қиммат нархларда сотиб олгани аниқланган.
Шунга асосан 2021 йилнинг 31 август куни Пахтаобод тумани ИИБ ҳузуридаги тергов гуруҳи томонидан Х.А.га нисбатан Жиноят кодексининг 168 (фирибгарлик), 277 (безорилик) ва 140 (ҳақорат қилиш) моддалари билан терговдан қочиб яширингани сабабли сиртдан айблов ва қидирув эълон қилинган.
У жорий йилнинг февраль ойида Россия Федерацияси Уфа шаҳрида ҳуқуқ-тартибот ходимлари томонидан ушланган ва шу йилнинг 31 август куни Ўзбекистонга олиб келинган.
Ҳозирда мазкур жиноят иши бўйича Жиноят процессуал кодексининг талабларига асосан тергов ҳаракатлари олиб борилмоқда.
Изоҳ (1)
Бу ёлғон маълумот