Ўзбекистон сув тошқинлари юз берган Покистонга 1 сентябрь куни инсонпарварлик ёрдами жўнатди. Бу ҳақда «Дунё» АА хабар берди.
Қайд этилишича, Покистонга ҳарбий самолёт орқали озиқ-овқат маҳсулотлари, шу жумладан ўсимлик ёғи, ун, гуруч, гўшт консервалари, қандолат ва макарон маҳсулотлари, шунингдек тўқимачилик маҳсулотлари ва бошқа товарлардан иборат қарийб 40 тонна юк етказилади.
Эслатиб ўтамиз, сўнгги бир неча ҳафта ичида Покистонда мисли кўрилмаган муссон ёмғирлари ва сув тошқинлари 30 миллиондан ортиқ кишининг кундалик ҳаётини издан чиқарган. Мамлакатнинг ғарби ва жанубидаги Балужистон ва Синд провинциялари энг кўп зарар кўрган. Юз минглаб одамлар бошпанасиз қолган.
Кучли ёмғир ва кенг кўламли тошқинлар оқибатида 1100 дан ортиқ одам вафот этган. Покистон расмийларига кўра, бу йил сув тошқинлари билан боғлиқ вазият 2010 йилга қараганда жиддийроқ, ўша йили табиий офат оқибатида 1,7 минг киши ҳалок бўлган.
Айни пайтда Покистон турли давлатлардан халқаро ёрдам олишни бошлади. Жумладан, Туркия ва Бирлашган Араб Амирликларидан чодирлар ва зарур маҳсулотлар ортилган самолётлар етиб борган.
Изоҳ (0)