Саудия Арабистонида суд Нура бин Саид ал-Қаҳтаний исмли аёлни ижтимоий тармоқлардаги постлари учун 45 йил қамоққа ҳукм қилди, деб ёзади Meduza.
Associated Press ўз қўлига келиб тушган суд ҳужжатига таяниб хабар беришича, суд маҳкума интернет ёрдамида «жамият негизига путур етказган» ва «жамоат тартибини бузган», деган қарорга келган.
Ал-Қаҳтаний ижтимоий тармоқларда айнан нималар ёзгани номаълум. DAWN ташкилоти (Шимолий Африка ва Яқин Шарқда демократия ва инсон ҳуқуқлари учун курашувчи нотижорат ташкилот) маълум қилишича, айбловлар террорчилик ва кибержиноятчиликка қарши қонунларга асосланган бўлиб, улар кенг талқинга йўл қўяди. Ишни одатда миллий хавфсизлик ва террорчилик ҳақидаги ишлар билан шуғулланадиган ихтисослаштирилган суд кўриб чиққан.
Аёлнинг ўзи ҳақидаги тафсилотлар ҳам келтирилмаган. The Times уни аёллар ҳуқуқлари учун курашувчи фаол деб атаган, бироқ Associated Press ал-Қаҳтанийнинг активистлик фаолияти ҳақида маълумотлар йўқлигини ёзган. Шуниси маълумки, у 2021 йил июлидан буён ҳибсда сақланмоқда, 45 йиллик қамоқ муддати эса унга апелляция чоғида тайинланган.
Ал-Қаҳтанийга нисбатан ҳукм — саудиялик аёлга ижтимоий тармоқлардаги постлари учун жуда катта қамоқ муддати белгиланиши билан боғлиқ сўнгги вақтлардаги иккинчи ҳолатдир. Август ўрталарида 34 ёшли Салма аш-Шабоб аёллар ҳуқуқлари учун курашган сиёсий маҳбусларни озод этиш ҳақидаги даъватлардан иборат твитлари ҳамда бошқа ҳуқуқ ҳимоячиларининг худди шундай постларини ретвит қилгани учун 34 йилга қамалгани маълум бўлганди.
Изоҳ (0)