CNN: АҚШ ва Украина қарши ҳужумга тайёрланишда ҳарбий ўйинлар олиб борган

Вашингтон Киевга жавоб ҳужумига тайёрланишда ёрдам берган. Бу ҳақда CNN америкалик мансабдорларга, шунингдек, Ғарб ва Украинадаги манбаларига таяниб хабар берди.

Уларнинг маълумотларига кўра, АҚШ Украинани бир вақтнинг ўзида бир нечта фронтларда узоқ қолиб кетмаслик учун операцияни нишонлар ва география нуқтаи назаридан чегаралашга чақирган. Манбаларнинг айтишича, дастлаб Киев анча кенг қарши ҳужум имкониятини кўриб чиққан, бироқ Херсон вилояти ҳудудида унинг кўламларини камайтиришга қарор қилган.

Бундан ташқари, Вашингтон Киев билан ҳарбий ўйинларда иштирок этган, бу таҳлилий машқлар бўлиб, Украина қуролли кучларига турли сценарийларда айнан қандай қилиб муваффақиятга эришишни тушунишга ёрдам беришга қаратилган.

Пентагон вакили бригада генерали Пет Райдер икки мамлакат ҳарбийлари мунтазам мулоқот олиб боришини тасдиқлади, аммо тафсилотларни келтиришдан бош тортди. «Биз украиналикларга ўзлари дуч келаётган хавфларни яхшироқ англашда ва ўз мамлакатини Россия тажовузидан ҳимоя қилишда ёрдам бериш учун уларга маълумотлар тақдим этамиз», — деди у ва якуний қарорни Киев қабул қилишини таъкидлади.

29 август куни CNN разведка маълумотларидан хабардор бўлган америкалик мансабдорларга таяниб, Украина кучлари мамлакат жанубида ҳужумга ўтиш учун шароитларни яратаётгани, ҳужумлар ерда ва ҳавода бўлиши кутилаётганини ёзганди. Ўша куниёқ Украина жанубий қўмондонлиги матбуот хизмати Украина қуролли кучлари турли йўналишларда, шу жумладан, Херсон вилоятида ҳужум ҳаракатларини бошлаганини маълум қилди.

Россия Мудофаа вазирлиги Украина қуролли кучлари Херсон ва Николаев вилоятларида ҳужумга ўтишга уринганини тасдиқлади, аммо у муваффақиятсиз бўлганини қайд этди. Эртаси куни вазирлик Украина ҳарбийлари Николаев ва Кривой Рог томондан ҳужум қилишга интилганини, лекин «катта талафотлар» кўрганини маълум қилди.

Украина ҳукумати мамлакат жанубида ҳужумга ўтиш режаларини расман тасдиқламаган эди. Август бошида президент офиси маслаҳатчиси Михаил Подоляк BBC’га берган интервьюсида бу ҳақдаги хабарларни ахборот кампаниясининг бир қисми деб атаганди. Давлат раҳбари Владимир Зеленский эса Киев ҳарбий хизматчиларнинг асл ниятларини ошкор этмаслигини таъкидлаганди.