Украинанинг босиб олинган ҳудудларида Россия томонига ўтиб кетган мансабдорлар ўлдириб кетилмоқда

Россия томонидан босиб олинган ҳудудларда муваққат маъмуриятларга Москва томонидан тайинланган, Россия истилосини қўллаб-қувватлайдиган украиналик мансабдорлар ўлдириб кетилаётгани ҳақидаги хабарлар уруш бошланганидан буён чиқиб турибди. Сўнгги вақтларда, Украина қуролли кучлари томонидан Херсон вилоятида қарши ҳужум эълон қилиниши фонида, уларнинг сони айниқса ошди. Meduza Украинада хоинлиги учун коллаборантлар (сотқинлар) деб аталаётган, Россияда эса қонуний ҳукумат сифатида таништирилаётган одамларга суиқасд далилларини тўплади.

Херсон вилояти

20 март — Херсонда шаҳарнинг собиқ мэри ва Херсон вилоятининг россияпараст маъмурияти раҳбари Владимир Сальдонинг ёрдамчиси Павел Слободчиков ўз уйи яқинида, машина ичида отиб ташланган.

20 апрель — Херсонда Херсон вилоятининг россияпараст маъмурияти раҳбари ўринбосари Кирилл Стремоусовнинг ёрдамчиси, блогер Валерий Кулешов машинада отиб кетилган.

18 июнь — Херсонда автомобиль портлаши оқибатида Жазоларни ижро этиш хизмати вилоят бошқармасининг россияпараст маъмурият томонидан тайинланган бошлиғи Евгений Соболев касалхонага ётқизилган.

22 июнь куни Чернобаевкада қишлоқнинг россияпараст маъмурияти раҳбари Юрий Турулевнинг автомобили портлатилган. У енгил жароҳатлар олган.

24 июнь — Херсонда автомобиль портлаши оқибатида Херсон вилояти россияпараст ҳукуматининг Оила, ёшлар ва спорт бошқармаси бошлиғи Дмитрий Савлученко ҳалок бўлган.

7 июль — Новая Каховкада полиция бошлиғи ўринбосари Сергей Томко ўз машинасида отиб ташланган.

4 август — Херсон вилоятининг истилочи маъмурияти раҳбари Владимир Сальдо заҳарланган, деб гумон қилиниб Москвада касалхонага ётқизилган.

6 август — босиб олинган Новая Каховка маъмурияти раҳбари ўринбосари Виталий Гура ўз уйида отиб кетилган. Мансабдор оғир жароҳатлар билан касалхонага ётқизилган, у Қримга олиб кетилаётганида вафот этган.

22 август — Херсонда босиб олинган Херсон вилояти маъмуриятининг ички сиёсат департаменти бошлиғи ўринбосари Игорь Телегиннинг автомобили портлатилган. Мансабдор омон қолган.

29 август — Голая Пристань шаҳрида босиб олинган Херсон вилояти маъмурияти раиси ўринбосари Алексей Ковалёв ўз уйида ўлик ҳолда топилган. Унинг бошига ўқ узишган. Июнда унинг машинаси портлатилган эди, ўшанда у касалхонага тушган.

Запорожье вилояти

22 май — босиб олинган Энергодар шаҳар мэри Андрей Шевчик уйининг подъездидаги портлашдан кейин касалхонага ётқизилган.

11 июль — босиб олинган Мелитополь шаҳрида шу номдаги туман маъмурияти раҳбари Андрей Сигутуга суиқасд уюштирилган, у жабр кўрмаган.

12 август — Мелитополда портлаш оқибатида «Ягона Россия» сайлов штаби раҳбарларидан бири Олег Шостак яраланган.

24 август — босиб олинган Михайловка қишлоғи маъмурияти раҳбари Иван Сушко автомобиль портлаши оқибатида ҳалок бўлган.

26 август — Бердянскда қочқинлар яшаган соғломлаштириш маркази яқинидаги портлаш оқибатида шаҳар ДАН бошлиғи ўринбосари Александр Колесников ҳалок бўлган.

27 август — босиб олинган Михайловкада шаҳар полицияси бошлиғи Андрей Рижков осилган ҳолатда топилган.

Харьков вилояти

10 июль — Валикий Бурлук қишлоғи раҳбари Евгений Юнаков маҳаллий маъмурият биноси ёнида автомобиль портлаши оқибатида ҳалок бўлган.

Луганск вилояти

2 март — ундан аввалроқ ўғирлаб кетилган Кременная шаҳар мэри, Луганск вилоят кенгаши собиқ депутати Владимир Струк ўлик ҳолда топилган.

Донецк вилояти

20 август — Мариуполда ҳайвонот боғига кириш дарвозаси яқинида қўлбола бомба портлаган, у ерга россияпараст мэр Константин Ивашченко ташриф буюриши кутилаётганди. Ҳеч ким жабрланмаган.