Қозоғистон президенти Қосим-Жўмарт Тўқаев шу йил кузда навбатдан ташқари президент сайловларини ўтказишни таклиф қилди. Бу ҳақда у мамлакат халқига йўллаган мурожаатида айтиб ўтди, деб ёзади «РБК».
«Шу кузда навбатдан ташқари президент сайловларини ўтказишни таклиф қиламан. Адолатли Қозоғистонни қуриш йўлида тубдан ва ҳар томонлама ислоҳотларни муваффақиятли тарзда амалга ошириш учун аҳоли ишончининг янги мандати зарур», — деди у.
Тўқаев, шунингдек, президентлик мандатини етти йиллик битта муддат билан чеклашни ва қайта сайланишни тақиқлашни таклиф қилди (ҳозир президент беш йил муддатга, кўпи билан кетма-кет икки марта сайланади).
Бундан ташқари, у январь намойишлари иштирокчилари учун амнистия эълон қилди, тартибсизликлар ташкилотчилари ҳамда давлатга хиёнат ва ҳокимиятни зўравонлик билан алмаштиришга уринишда айбланувчилар бундан мустасно.
Тўқаев 2023 йилда Мажлис (Парламент қуйи палатаси) ва Маслаҳат (маҳаллий ваколат органи)ларга сайловлар ўтказишни ҳам таклиф қилди.
Иқтисодий ислоҳотлар қуйидагиларни ўз ичига олади:
- мамлакатда давлатнинг нарх шаклланишига аралашувидан воз кечишни ўз ичига олувчи «янги иқтисодий йўналиш» пайдо бўлади;
- 2023 йилда янги Солиқ кодекси ишлаб чиқилади;
- ҳашамат солиғи пайдо бўлиши мумкин, у ўрта синфга тааллуқли бўлмайди;
- энг кам иш ҳақи 10 минг тенге (230 минг сўм)га оширилади, пенсиянинг минимал қиймати ҳам ошади;
- аёллар учун пенсия ёши 2028 йилгача 61 ёш деб белгиланади;
- Миллий фонд йиллик инвестиция даромадининг 50 фоизи болаларнинг махсус жамғарма ҳисобларига ўтказилади (18 ёшга киргунича).
Изоҳ (0)