31 август куни ташқи ишлар вазири вазифасини бажарувчи Владимир Норов Ўзбекистонда дипломатик миссиясини якунлаётган Америка Қўшма Штатлари элчиси Даниел Розенблюмни қабул қилди. Бу ҳақда ТИВ ахборот хизмати хабар қилди.
Қайд этилишича, Норов элчини президент фармонига кўра «Дўстлик» ордени билан тақдирлангани юзасидан табриклаган.
Розенблюм Ўзбекистондаги фаолияти давомида республиканинг барча соҳаларда ислоҳотларга гувоҳ бўлганини таъкидлаган. АҚШ ҳукуматининг Ўзбекистонда сиёсатини ҳар томонлама қўллаб-қувватлаши қайд этилган.
Ўзбекистон—АҚШ Стратегик шериклик мулоқоти доирасида қатор тадбирларнинг муваффақиятли ўтказилгани эътироф этилган. Илгари эришилган келишувларнинг тўлиқ ижроси юзасидан биргаликда ишлашга тайёрлиги тасдиқланган.
Икки томонлама даражада ва «C5+1» шаклидаги бўлажак учрашувлар жадвали бўйича фикр алмашилган.
«Элчи Ўзбекистон томонига мамлакатда дипломатик фаолиятини амалга оширишда ҳар томонлама қўллаб-қувватлагани ва қулай шароитлар яратгани учун миннатдорчилик билдирди. Қандай лавозимни эгаллашидан қатъий назар Ўзбекистоннинг дўсти бўлиб қолишини таъкидлади», — дейилади хабарда.
Изоҳ (0)