Ўзбекистонда сўнгги бир ҳафта ичида шафтолининг улгуржи нархлари 14 фоизга арзонлашди ва шу билан ўтган йилнинг шу давридаги энг паст кўрсаткичларни янгилади. Бу ҳақда EastFruit хабар бермоқда.
Шу билан бирга, ўтган йилги даражалар билан фарқ кенгаймоқда — жорий улгуржи нархлар 2021 йил август ойи охирида қайд этилган даражадан роппа-роса 2 баравар паст.
2022 йилнинг 19 августидан 26 августига қадар Ўзбекистонда шафтолининг ўртача улгуржи нархлари бри килограм учун 7 минг сўмдан 6 минг сўмгача пасайган.
Ўтган йилги кўрсаткичлар билан фарқ ҳам кенгайиб бормоқда — 2022 йил 26 август ҳолатига кўра, Ўзбекистонда шафтолининг ўртача улгуржи нархлари ўтган йилнинг шу санасига нисбатан 2 баравар паст.
Бунга икки омил сабаб бўлмоқда: биринчиси, Ўзбекистонда ўтган йилга нисбатан шафтоли ҳосили яхши олинган.
Иккинчи омил — шафтоли боғларининг кўпайиши. Охирги беш йилда Ўзбекистоннинг биргина Фарғона вилоятида шафтоли плантацияларининг умумий майдони 26 фоизга ошди.
Фарғона вилояти шафтоли экспортида етакчи ўрин тутади, Ўзбекистондан экспорт қилинадиган ушбу маҳсулотларнинг деярли ярми ушбу вилоят ҳиссасига тўғри келади.
Шубҳасиз, ички бозорда шафтолининг юқори ҳосилдорлиги ва арзон нархлари ушбу маҳсулотларни ташқи бозорларга жўнатиш ҳажмининг ошишига хизмат қилмоқда.
Бу эса ўз навбатида мева сегментида Ўзбекистон экспорт даромадларининг муҳим манбаи ҳисобланади.
Дастлабки расмий статистик маълумотларга кўра, 2022 йилнинг 21 майидан 29 августигача бўлган даврда Ўзбекистондан шафтоли экспорти 73,3 минг тоннани ташкил этиб, жами 65,4 миллион долларга етди.
Изоҳ (0)