Жорий йил январь июль ойларида мамлакатда ўтган йил мос давридагидан 884 млн метр куб кам газ қазилди. Рақамлар Статистика қўмитаси ҳисоботида қайд этилган.
-xJ5u8xLW.avif)
Етти ой мобайнида Ўзбекистонда 25,3 млрд метр куб табиий газ қазиб олинган. Бу ўтган саккиз йилнинг мос даврлари учун энг кам кўрсаткич ҳисобланади. Масалан, газ қазишда 2024 йил илк етти ойидагига қараганда (26,2 млрд метр куб) 3,4 фоиз пасайиш кузатилган. Агар олти йил олдинги рақамларга қаралса, ҳажмлар ҳозиргидан 10 млрд метр куб кўп бўлганини кўриш мумкин.
Таққослаш учун, ўтган йилларнинг январь июль ойларида қуйидаги ҳажмларда газ қазиб олинган:
- 2017 йил — 32,2 млрд метр куб;
- 2018 йил — 35,1 млрд метр куб;
- 2019 йил —35,4 млрд метр куб;
- 2020 йил — 29 млрд метр куб;
- 2021 йил — 30,7 млрд метр куб;
- 2022 йил — 30,3 млрд метр куб;
- 2023 йил — 27,4 млрд метр куб.
Жорий йилда газ қазиб олиш сезиларли камайганига қарамай, мазкур маҳсулот экспорти ҳажми оширилган. Хусусан, январь июль ойларида хорижга 438,6 млн долларлик газ сотилган. Бу ўтган йил мос давридаги экспорт ҳажмидан 38,2 фоизга кўп. Етти ой давомида мамлакат 734 млн долларлик газ импорт қилган.
Республикада аҳолига газ ишлаб чиқарилган нархидан арзон сотилгани сабаб кўрилган зарарни қоплаш учун давлат бюджетидан субсидия тўлаб келинади. Масалан, 2025 йил учун шундай мақсадга 7 трлн сўм ажратилади. Келаси йилда газга бюджетдан 5,9 трлн сўм, 2027 йилда 5,5 трлн сўм берилиши режалаштирилган.
2024 йил 18 декабрь куни бўлиб ўтган Сенат ялпи мажлисида бош вазир ўринбосари — иқтисодиёт ва молия вазири Жамшид Қўчқоров газга субсидия бериш қачон тўхтатилишини айтганди.
“Субсидиялаш 2025-2026 йилларда ҳам давом этади, 2027 йил кескин пасаяди, 2028 йилдан бошлаб субсидиялар бюджетдан берилмайди”, деган ҳукумат мулозими.
Аммо режа ўзгарган кўринади, яъни 2028 йилда ҳам газни субсидиялашга бюджетдан 5 трлн сўм йўналтирилади.
Изоҳ (0)