Киевнинг «қора рўйхати»даги америкаликлар АҚШ Конгрессидан ўз ҳуқуқларини ҳимоя қилишни талаб қилмоқда

Украина Дезинформацияга қарши кураш марказининг (ДҚК) «қора рўйхати»га киритилган Америка фуқаролари АҚШ Конгрессига ўз ҳуқуқлари ва сўз эркинлигини ҳимоя қилиш чораларини кўриш талаби билан мурожаат қилди. Бу ҳақда «Gazeta.ru» хабар бермоқда.

Америкаликларга кўра, ДҚК уларни «Россия ташвиқоти»ни тарғиб қилишда айбламоқда. Бундан ташқари, улар «ахборот террорчилари» ва «ҳарбий жиноятчилар» деб атаган.

Бир гуруҳ АҚШ фуқаролари ДҚК Вашингтон томонидан молиялаштирилганини таъкидлаган. Шу муносабат билан америкаликлар Конгрессни Украина агентлигини молиялаштириш ва унинг америкаликлар ҳуқуқлари ва хавфсизлигига бевосита таҳдид яратишдаги ролини текширишга чақирди.

Ҳаммаси бўлиб, Украина Дезинформацияга қарши кураш марказининг «қора рўйхати»га бир нечта мамлакатлардан 72 нафар шахснинг исми киритилган.

Аввалроқ украиналик қўшиқчи ва сиёсатчи Анастасия Приходко Вера Брежнева ва унинг турмуш ўртоғи Константин Меладзени сотқин деб атаб, уларни Украинанинг «қора рўйхати»га киритишга чақиргани эди.