Жиноят ишлари бўйича Балиқчи туман судида ўртадаги келишмовчилик оқибатида акаси билан жанжаллашиб, унга чопқи билан жароҳат етказган укага суд ҳукми ўқилди. Бу ҳақда «Дарё»га вилоят суди ахборот хизмати хабар бермоқда.
Маълум бўлишича, Балиқчи туманида яшовчи М.Ш. таниши билан уйи олдида спиртли ичимлик истеъмол қилмоқчи бўлиб турган пайтда акаси Х.М.ни кўриб қолиб, ундан спиртли ичимлик сотиб олиш учун пул сўраган. Шунда ака уларга пул бермасдан «ароқни эркаклар ичади, сенлар эркак эмассан», деб дўконга кириб кетган.
Орадан анча вақт ўтгач Ш.М. уйига кирганида ҳовлида акаси ҳам маст ҳолда уйида бақир-чақир қилаётганини эшитиб, уни тинчлантириш ва ҳақорат қилгани учун қасд олиш мақсадида айвонга ўтиб, акаси билан ўзаро гап талашган. Келиб чиққан жанжал натижасида Ш.М. айвон бетонида турган чопқи билан акасининг ҳаёт учун муҳим аъзоси бўлган бош ва қўл қисмларига бир неча маротаба урган. Бироқ келинойиси ва бошқаларнинг қаршилик кўрсатиши ортидан жиноятини давом эттира олмаган.
«Укам дўстининг олдида нима сабабдан ҳақорат қилганимни сўради. Шунда унга нима иши борлигини, ичишни эркакларга чиқарганлигини, уйига кетиши мумкинлигини айтдим. Кейин мен билан тортишаётгани учун бир мушт урдим. Шу тариқа уруш бошланди. Ундан кейин нима бўлганини аниқ эслай олмайман. Ўзимга келганимда бошимдан қон оқаётганини, турли жойларимдан жиддий жароҳат олганимни кўрдим. Барча кўнгилсизликлар мастлик оқибатида бўлди. Шу сабабли укамга нисбатан ҳеч қандай даъвойим йўқ», — деди ака.
Ишни кўриб чиққан судья Фурқат Собиров укани Жиноят кодексининг 25-моддаси (жиноятга тайёргарлик кўриш ва жиноят содир этишга суиқасд қилиш), 97-моддасининг 1-қисми (қасддан одам ўлдириш) ҳамда 105-моддаси 2-қисмининг «в», «м» бандлари (қасддан баданга ўртача оғир шикаст етказиш) билан айбли деб топган. Унга нисбатан тайинланган жазоларни қисман қўшиш йўли билан узил-кесил ўташ учун беш йил олти ой муддатга озодликдан маҳрум қилиш жазоси берилган.
Изоҳ (0)