Ижтимоий тармоқларда Бўзсув каналининг Зангиота тумани «Токзор» МФЙ ҳудудидан ўтган қисмига заҳарли канализация сувлари оқизилаётгани тўғрисида эълон қилинган видеомурожаат юзасидан тезкор ўрганиш ишлари олиб борилди.
Тошкент шаҳар Экология бошқармаси хабарига кўра, ўрганиш жараёнига экологик мобил лаборатория ҳам жалб қилиниб, Бўзсув каналига ташланаётган оқова сувлардан, каналнинг 500 метр тепа ва паст қисмларидан таҳлил учун намуналар олинди.
Ўрганишлар давомида сувнинг қора рангда экани тўқимачилик корхоналарида ишлаб чиқариш жараёнида ҳосил бўладиган рангли оқова сувлар билан боғлиқ экани маълум бўлди. Шунингдек, «Бўзсув аэрация станцияси»нинг технологик жараёнлари кўздан кечирилди ҳамда ушбу тозалаш иншоотига мунтазам равишда меъёрдан ортиқ ифлосланган моддалар ва рангли эритмалар ташлаб келаётган 7 та тўқимачилик ва 2 та қоғозни қайта ишловчи корхоналар рўйхати шакллантирилди.
Таъкидланишича, эндиликда ҳар бир корхона фаолиятини текшириш юзасидан бизнес-омбудсманга буюртмалар киритилиб, белгиланган тартибда экологик назорат ўрганиш ишлари олиб борилади.
Мавзуга доир: Бўзсув канали бўйига қурилиш чиқиндисини ағдариб кетган юк автомобиль ҳайдовчисига чора кўрилди
Изоҳ (0)