«Дарё»га Қашқадарё вилоятининг Қарши туманидаги тиббиёт бирлашмага қарашли лабораторияда фаолият юритувчи тиббиёт ходимлари мурожаат қилиб, раҳбарияти томонидан ишдан бўшаш ҳақида огоҳлантириш хати берилганини, тез орада 162 нафар тиббиёт ходими ишсиз қолиш эҳтимоли борлигини маълум қилди.
«Биз лаборатория соҳасида ишлаймиз, барчамиз хотин-қизлардан иборат жамоамиз. Қарши туманидаги лаборатория тизими аутсорсинг тизимига ўтказилиши муносабати билан бизга ишдан бўшаш ҳақида огоҳлантириш хати берилди. Шу сабаб биз ишсиз қолишимиз мумкин. Бизга ёрдам беринг», — дейди видеомурожаатдаги аёллардан бири.
Яна бир тиббиёт ходими президентнинг соҳага эътибори сабаб тиббиёт ходимларининг ойлик маоши ошганидан хурсанд бўлганини, аммо бу ўзгариш уларнинг хурсандчилигига чек қўйганини айтмоқда.
«Биз ишлаётган лаборатория бугунги кунда замонавий жиҳозлар билан таъминланди. Бунга Сизнинг эътиборингиз сабаб бўлди. Қолаверса, ойлик маошларимиз икки баравар оширилди. Бундай ўзгаришлардан хурсанд бўлиб, шижоат билан ишлаётганимизда бўшашимиз ҳақида огоҳлантириш беришяпти. Шу сабаб биз тушкунликка тушиб қолдик. Кўплаб ҳамкасбларимиз шу ойлик-маошига фарзандларини кредитга ўқитмоқда. Орамизда боқувчисини йўқотганлар бор, ногирон боқадиганлар бор. Шу сабабли бизга ёрдам беришингизни сўраймиз», — дейди Ўзбекистон президентига мурожаат қилган яна бир тиббиёт ходими.
Мазкур мурожаатга эътибор қаратган вилоят ҳокимининг биринчи ўринбосари Алишер Қодиров Қарши туман тиббиёт бирлашмаси бошлиғига юзланиб, ташриф протоколида тизим тажриба сифатида аутсорсинг тизимига ўтиши айтилганини, бироқ, шу сабаб ишлаб турган ходимлар ишдан бўшатилсин дейилмаганини айтиб, бош шифокор Муқаддас Мирсаидовадан бунга изоҳ сўрайди.
«Нимага асосланиб, тиббиёт ходимларига бўшаш тўғрисида огоҳлантириш хати беряпсиз, бу ҳақда кимдир топшириқ бердими», — дейди Алишер Қодиров туман тиббиёт бирлашмаси бошлиғи қараб.
Бунга жавоб берган бош шифокор бошқарма таркибидаги инспекциядан шу ҳақда топшириқ келганини, лаборатория бюджет тизимидан чиқарилаётганини айтади.
«Ҳали аутсорсинг тизимининг ўзи аниқ бўлмаса, танлов бўлмаган бўлса нега бунақа иш қилиняпти», — дейди вилоят ҳокими ўринбосари.
Тиббиёт бирлашма бошлиғи Муқаддас Мирсаидова эса Ҳисоб палатасидагилар ҳам 1 сентябрга қадар лаборатория ходимлари ишдан бўшатилиши лозимлигини сўраётганини таъкидлайди.
«Дарё»нинг бу ҳақдаги сўровига жавоб берган вилоят Соғлиқни сақлаш бошқармаси масъуллари масалани қуйидагича изоҳлади.
Президентнинг 2022 йил 26 январдаги ПҚ-102-сонли қарорининг 6-бандига асосан ҳар бир ҳудуддан биттадан туман (шаҳар) тиббиёт бирлашмаси муассасаларини марказлаштириш ва давлат-шериклик асосида аутсорсингга бериш чораларини кўриш белгиланган эди.Маълум қилинишича, шу асосда Қарши туманида ҳам мазкур топшириқ ижроси доирасидаги тадбирлар амалга оширилмоқда.Мазкур қарорга мувофиқ ҳамда Вазирлар Маҳкамасининг 2020 йил 10 январдаги ‘Ўзбекистон Республикаси соғлиқни сақлаш вазирлиги тузилмасида ташкилотларда аутсорсинг хизматлари кўрсатиш тартиби тўғрисидаги Низомни тасдиқлаш ҳақидаъги қарори иловаси банди, президентнинг 2022 йил 21—22 апрелда вилоятга ташрифи давомида ва Халқ депутатлари вилоят Кенгашининг навбатдан ташқари сессиясида берган топшириқлари бўйича йиғилиш баёни, Соғлиқни сақлаш вазирлигининг 2022 йил 11 мартдаги марказлашган лаборатория, стерилизация ва юқори текширувлар тизимини ташкил этишга оид чора-тадбирлар режаси ижроси доирасида 2022 йил 1 сентябрга қадар вилоятнинг Қарши тумани ва Шаҳрисабз шаҳридаги лабораторияларни марказлаштириш ва давлат-хусусий шериклик асосида аутсорсингга бериш топшириғи берилган», — дейилади вилоят ССБ изоҳида.
Бу хусусида Қарши тумани тиббиёт бирлашмасида лабораторияларда фаолият кўрсатаётган тиббиёт ходимлари иштирокида йиғилиш ўтказилиб, юқоридаги меъёрий ҳужжатлар талаблари бўйича батафсил тушунтириш ишлари олиб борилган. Мазкур йўналишдаги ходимларга Ўзбекистон Республикаси Меҳнат кодексининг 100-моддаси 2-қисми 1-бандига асосан тузилган меҳнат шартномаси муддатидан олдин бекор қилиниши ҳақида огоҳлантириш хатлари берилган ва бу йўналишдаги ҳуқуқлари тушунтирилган», — дейди бошқарма ахборот хизмати масъули Нуриддин Эгамов.Эгамовнинг қўшимча қилишича, лаборатория аутсорсинг тизимига ўтказилган тақдирда ҳам ишчилар ишсиз қолмайди.
Қарши тумани тиббиёт бирлашмасида фаолият кўрсатаётган лаборатория ходимлари ишсиз қолмайди. Балки бирлашманинг лаборатория хизмати аутсорсинг шартномаси орқали ўтказилган хўжалик юритувчи субъект томонидан қайта танлов ўтказилиб, етарли малакага эга бўлган ходимлар тўлиқ иш билан таъминланади. 2023 йилга қадар бирлашманинг лаборатория хизмати ходимларининг иш ҳақлари бюджет маблағлари ҳисобидан ходимлар сонига мутаносиб равишда туман молия бўлимидан тўлаб берилади», — дейди у.Қайд этилишича, хусусий тадбиркор томонидан шифохона лаборатория хизматининг моддий техника базаси ривожлантирилади, янги тиббий асбоб-ускуналар жалб этилади, беморлар узоқ ҳудудларга қатнаб юришининг олди олинади, янги лабаратория хизмат турлари жорий этилади.
Изоҳ (0)