Қрим парламенти вице-спикери Владимир Бобков Украина президенти Владимир Зеленскийнинг ярим оролни Украина таркибига қайтариш режаларини «бемаъни фикр» деб атади. Бу ҳақда «РБК» хабар бермоқда.
«Бу баёнотларнинг барчаси — бемаъни валдирашлар. Ядро мақомига эга буюк давлатдан ниманидир олиб қўйиш, ниманидир зўрлик билан тортиб олиш — бу бемаъни фикр. Буни ҳатто бу баёнотларни берадиганлар ҳам англайди, баъзан уларнинг ақли жойидалигига шубҳа уйғонса ҳам», — деди Бобков.
23 август куни «Қрим платформаси» онлайн-саммитида Зеленский Украина Қримни «бошқа мамлакатлар билан маслаҳатлашмаган ҳолда, ўзи тўғри деб билган ҳар қандай воситалар ёрдамида қайтариб олиши»ни айтганди.
Украина етакчиси сўзларига кўра, Киевда аллақачон ярим оролни қайта тиклаш стратегияси бор, у Қрим Украина таркибига ўтганидан кейин ҳукумат томонидан амалга оширилади. Бош вазир Денис Шмигаль Киевнинг мақсади — Қримни «гуллаб-яшнаётган боғга айлантириш» эканини айтганди.
Аввалроқ Туркия президенти Ражаб Тоййиб Эрдўғон Киевдаги «Қрим платформаси» онлайн-саммити иштирокчиларига йўналтирилган видеомурожаатида Қрим ярим ороли Украинага қайтарилиши зарурлигини маълум қилгани хабар берилганди. «Халқаро ҳуқуққа мувофиқ, Қрим Украинага қайтарилиши керак, у Украинанинг ажралмас қисмидир», — деди Туркия раҳбари.
Москва 2014 йилги референдумдан кейин Қримнинг кимга тегишлилиги масаласи муҳокама қилинмаслигини бир неча марта айтиб ўтган. «Қрим халқи қарор қабул қилди ва овоз берди. Масала тарихий жиҳатдан ёпилди», — деган эди Путин 2016 йилда. Россия ташқи ишлар вазири ўринбосари Андрей Руденко 2019 йилда Россия Қримнинг тегишлилик масаласини ҳеч қанақа майдонда муҳокама қилмаслигини айтганди.
Мавзуга доир:
- АҚШ Украинага берилган қуроллардан Қримга зарбалар учун фойдаланиш мумкинлигини билдирди
- Қримдаги ҳарбий аэродромда қатор портлашлар юз берди (видео)
- «Агар Қримга ҳужум қилса, Украина учун қиёмат куни келади» — Медведев
- Зеленский ҳарбийларга Украинанинг жанубий ҳудудларини жанг билан қайтариб олишни буюрди
Изоҳ (0)