Навоий эркин иқтисодий зонасида умумий қиймати 10 млн долларга тенг «Ўзбекистон—Хитой дори технологиялари парки» ташкил этилмоқда. Бу ҳақда Инновацион ривожланиш вазирлиги хабар берди.
Лойиҳа доирасида жорий йилда қурилиш ишларини бошлаш режалаштирилган бўлиб, хитойлик ҳамкорлар томонидан ишлаб чиқилган қурилиш лойиҳаси ҳозирда маҳаллий талабларга мослаштириш ишлари якунланди.
Мазкур лойиҳани амалга ошириш учун Навоий эркин иқтисодий зонасида 12 гектар ер майдони ажратилган.
Лойиҳани амалга ошириш натижасида Ўзбекистонда дори воситаларининг субстанцияларини илғор технологиялар асосида ишлаб чиқаришга мўлжалланган ноёб корхона вужудга келади.
Мазкур корхонанинг қурилиши 3 босқичда амалга оширилади ва 2024 йилнинг якунига келиб ишга туширилиши режалаштирилган.
Бизнес-режага кўра, 16 турдаги дори воситаларининг субстанциялари кенг миқёсда ишлаб чиқарилади ва кейинчалик уларнинг сони бозор талабларига мувофиқ равишда кенгайиб боради.
Шунингдек, лойиҳанинг бошланғич босқичида 45 та иш ўрни яратилиши режалаштирилган бўлиб, ҳар йили иш ўринлари сони ошириб борилади.
Изоҳ (0)