Сурхондарёда собиқ турмуш ўртоғи ва қайнонасини пичоқлаб ўлдирган 38 ёшли эркакка суд ҳукми ўқилди. Бу ҳақда «Севимли» телеканалининг «Замон» информацион дастурида хабар берилди.
Қотиллик 6 апрель куни соат 18:30 ларда Шўрчи туманида юз берганди. 38 ёшли эр С.Н. Россияга ишлашга кетганида, турмуш ўртоғи З.М. унга хиёнат қилиб келганини билиб қолган. 2022 йилнинг январида Ўзбекистонга қайтиб келган. Келиши билан вояга етмаган 3 нафар фарзандини ўзи билан олиб қолиб, турмуш ўртоғини у билан ажрашиш мақсадида уйдан чиқариб юборган.
Шундан сўнг эр-хотин ўртасида фарзандлар кимда қолиш-қолмаслиги устидан тортишув бошланган. Эркак собиқ хотинининг акасига З.М. уни тинч қўйиши лозимлигини, фарзандларини олиш учун судга ариза бермаслигини, агар ариза берган тақдирда уни ўлдириш билан таҳдид қилган. Бироқ хотини суд орқали фарзандларини ўзига олиш учун даъво ариза ёзиб, тақдим қилиш чораларини кўраётганини билиб, ундан ўч олиш мақсадида режа тузган.
Турмуш ўртоғига ўғлини кўрсатиш учун олиб боришини, у билан ярашмоқчи эканини айтиб, машинасида унинг онаси Х.Х. билан яшаб келаётган уйга борган. Ўғлини қайнонаси ва турмуш ўртоғи билан учраштирган. Шунда кейин ўғлини машина ичига қўйиб, қайнонаси ва хотинининг ухлашини кутган. Ўзига қулай вақт пайдо бўлганидан сўнг уйга кириб, айвонда ухлаб ётган қайнонаси ва хотинининг бўйин қисмига пичоқ билан тан жароҳати етказган. Улар кўп қон йўқотиш натижасида воқеа жойида вафот этган.
Жавобгарликдан қутулиш мақсадида Сурхондарё вилоятидан Тожикистонга ўтиб, у ердан Россияга қочиб кетган эркак Россия ИИВ ходимлари томонидан «Домодедово» аэропортида қўлга олинган ва Ўзбекистонга қайтарилган.
Қотилликни содир этган эркакка Жиноят кодексининг 97-моддаси 2-қисми «а», «в», «ж» бандлари (айбдорга аён бўлган ожиз аҳволдаги икки шахсни ўта шафқатсизлик билан қасддан ўлдириш )билан 20 йил муддатга озодлик маҳрум қилиш жазоси тайинланган.
Изоҳ (0)