Президент администрациясининг Назорат инспекциясига янги раҳбар тайинланди

Президент администрациясининг Назорат инспекцияси ва Ҳисоб палатасига янги раҳбарлар тайинланди. Бу ҳақда ЎзА хабар берди.

Маълум қилинишича, администрация назорат инспекцияси бошлиғи лавозимига шу кунгача Ҳисоб палатаси раиси ўринбосари бўлиб ишлаган Саидлазиз Саидкаримов тайинланди. Унинг ўрнига эса Президент администрацияси шўъба мудири Ўткир Жуманов Ҳисоб палатаси раиси ўринбосари бўлди.

Маълумот учун, Саидлазиз Саидкаримов 2020 йил сентябрь ойида Ҳисоб палатаси раиси ўринбосари лавозимига тайинланганди.

Саидлазиз Саидкаримов 1982 йил Тошкент вилоятида туғилган. У 2002 йил Ўзбекистон Миллий университетини ҳуқуқшунослик мутахассислиги бўйича тамомлаган. Саидлазиз Саидкаримов 2002—2009 йилларда Сирдарё вилояти прокуратураси тизимида турли вазифаларда ишлаган.

2009—2018 йилларда Ўзбекистон Бош прокуратурасининг бошқарма прокурори, катта прокурори, бошқарма бошлиғи ўринбосари, бошқарма бошлиғи лавозимларида фаолият олиб борган. 2018 йил февралдан мазкур тайинловга қадар Ўзбекистон Бош прокурорининг ўринбосари лавозимида ишлаб келган.