Ижтимоий тармоқларда Тошкент вилояти Ангрен шаҳридаги юк ортиш ва тушириш терминалида суратга олинган Chevrolet Spark расмлари кенг тарқалди. UzAuto Motors ҳолатга муносабат билдирди.
Қайд этилишича, UzAuto Motors Chevrolet Spark автомобилларини ишлаб чиқаришни тўхтатишга мажбурлиги ҳақида расман маълум қилган. Бу қарор жорий йилнинг август ойидан бошлаб АҚШнинг General Motors компанияси томонидан ушбу автомобилларни ва улар учун бутловчи қисмлар ишлаб чиқаришни тўхтатиш ҳақидаги глобал қарори билан боғлиқ.
Компания ушбу автомобиль моделига бўлган талаб юқори экани боис мавжуд қолган бутловчи қисмлардан ишлаб чиқарилган Spark партиясидан ташқари, экспортга йўналтирилган автомобилларни ҳам ички бозорга йўналтиришга қарор қилган.
20 август кунидан бошлаб автомобиллар учун контрактация бошланган. Биринчи куннинг ўзидаёқ барча мавжуд автомобиллар учун жами 12 600 та шартнома тузилган: 8 200 дона Spark ва 4 400 дона Nexia автомобили.
Уларни барча дилерлик марказларига етказиб бериш ишлари фаол олиб борилмоқда. Суратда аллақачон мижозлар томонидан шартнома тузилган ва кейинчалик мижозга етказиб бериш учун Ангрен шаҳрига етказилган автомобиллар кўрсатилган.Тез орада Chevrolet Nexia автомобиллари ҳам Ангрен шаҳрига мижозларга етказиб бериш учун жўнатилади, — дейилади хабарда.
Таъкидланишича, Ангрен шаҳридаги юк ортиш ва тушириш терминали UzAuto Motors’нинг таркибий бўлинмаси бўлиб, автомобилларни Қамчиқ довонининг ғарбидаги дилерлик марказларига тарқатилишидан олдин транзит сақлаш учун мўлжалланган.
Изоҳ (0)