Чирчиқ шаҳри ҳокими: «Биз ёшлигимизда тўп тепардик, ҳозирги ёшлар ахборот асри ёшлари — уларга билим бериш ҳам жуда масъулиятли»

Чирчиқ шаҳри ҳокими Даврон Ҳидоятов шаҳардаги 5-сон умумтаълим мактабида бўлиб ўтган устозлар форумида сўз олиб, бугунги кун ўқитувчилари жуда масъулиятли касб эгалари эканини таъкидлади, дея хабар берди «Дарё» мухбири.

Маълум бўлишича, бугун Чирчиқ шаҳар халқ таълими бўлими ташаббуси билан шаҳардаги 5-сонли умумтаълим мактабида янги ўқув йили олдидан устозлар форуми бўлиб ўтган.

Мактаб битирувчиларининг Олий таълим муассасаларига кириш кўрсаткичи вилоят миқёсида олганимизда яхши натижа бўлди. Бироқ бу йил ундан ҳам яхши натижа қайд этилиши керак, — деди шаҳар ҳокими.

Шаҳар халқ таълими бўлими мудири Назокат Ўразованинг аниқлик киритишича, ўтган ўқув йилида Чирчиқдаги мактаб битирувчиларининг 31 фоизи ОТМ талабаси бўлган.

Биз ёшлигимизда фақат тўп тепардик. Ҳозирги замон ёшларининг эса тўп тепишга вақти йўқ. Сабаби улар ахборот технологияларидан унумли фойдаланади. Улар ижтимоий тармоқларни диққат билан кузатади. Шу сабаб ҳам уларга таълим бериш, улар истаётган билимни улашиш жуда масъулиятли. Бугунги кун ўқитувчиси шу сабаб ҳам жуда билимли, тажрибали бўлиши керак, — деди Даврон Ҳидоятов.

Форум давомида ёш авлоднинг интеллектуал ва маънавий салоҳиятини юксалтиришга ҳисса қўшган ўқитувчилар шаҳар ҳокими ҳамда халқ таълими бўлимининг Фахрий ёрлиқ, эсдалик совғалари билан тақдирланди.