Ўзбекистон элчиси Жавлон Ваҳобовнинг Бразилия шаҳрига ташрифи давомида 23 август куни Бразилия таълим вазирининг олий таълим масалалари бўйича ўринбосари Вилас Боас де Соза билан музокаралар ўтказилди, деб хабар бермоқда «Дунё» ахборот агентлиги.
Қайд этилишича, учрашув давомида мамлакатимизда кадрлар тайёрлаш тизимини тубдан такомиллаштириш, соҳага илғор чет эл тажрибасини жалб этиш, рақобат муҳитини ривожлантириш, олий ўқув юртларининг сонини ошиши ва сифат жиҳатдан яхшиланиши, олий таълим муассасалари талабалари сонини сезиларли даражада ошириш борасида амалга оширилаётган ўзгаришларнинг асосий натижалари ҳақидаги батафсил маълумотлар Бразилия томонига тақдим этилган.
Вилас Боас де Соза Ўзбекистон ва Бразилия таълим соҳасида муштарак мақсадларни кўзлашини, унинг сифатини оширишда тажриба алмашиш лозимлиги ҳамда талаба ва ўқитувчиларнинг мунтазам алмашувини йўлга қўйиш кераклигини алоҳида таъкидлади. Унинг сўзларига кўра, мамлакатда 2,4 мингта олий ўқув юрти фаолият кўрсатиб, уларда 8 миллион талаба таҳсил олади. Айтилишича, 69 федерал университет давлат қарамоғида бўлиб, уларда жами 1,3 миллион талаба билим олмоқда.
Маълумотларга қараганда, мазкур вазирлик Бразилия Ташқи ишлар вазирлиги билан ҳамкорликда «ПЕГ-Г» номли дастур ишлаб чиққан бўлиб, унинг асосий мақсади мамлакатда чет эллик талабалар сонини оширишдан иборат. Ушбу дастурнинг муваффақиятли иштирокчилари ўқиш тўловидан озод этилади, турар жой ва стипендия билан таъминланади.
Шунингдек, вазирлик чет эллик талабаларнинг Бразилияда ўқишини қўллаб-қувватлаш мақсадида халқаро грантлар дастурини янада кенгайтириш устида иш олиб бормоқда. Шу мақсадда 27 та олий ўқув юртида университетга кириш имтиҳонларига тайёргарлик бўйича 69 та курс ташкил этилган.
Бундан ташқари, Вилас Боас де Соза Бразилия Ўзбекистон ёшлари учун португал тили курсларини ташкил этиш масаласини кўриб чиқишга тайёрлигини ҳам маълум қилган.
Изоҳ (0)