“Biznes miqyosiga qarab tabaqalashtirilgan yondashuvlarning e’lon qilinishi juda muhim qadam bo‘ldi” – iqtisodchi Otabek Bakirov prezident bilan tadbirkorlar muloqoti haqida

Iqtisodchi Otabek Bakirov Telegram’dagi kanalida prezident Shavkat Mirziyoyevning tadbirkorlar bilan muloqotida yangragan yangiliklarga munosabat bildirdi.

Iqtisodchining yozishicha, kichik tadbirkorlar foyda solig‘ini ikki barobar kam to‘lashi ularga katta yengillik beradi.

“2023-yilning 1-yanvaridan boshlab kichik biznes vakillarining foyda solig‘i ikki barobarga kamayadi. Bu imtiyoz 370 ming kichik tadbirkorga yengilliklar yaratadi va ularga juda katta stimul beradi. Qayd etish kerakki, ayrim tadbirkorlar soliq yukidan qochib, daromadlarini yashiradi va turli yo‘llar bilan o‘zini mikro biznes vakili qilib ko‘rsatishga urinadi. Ushbu yangilik mikro biznesdan kichik biznesga o‘tgan tadbirkorlarga o‘z o‘rnini topishda katta yordam beradi.

Ma’lumot uchun, kichik biznes toifasiga yillik aylanmasi 1 milliard so‘mdan 10 milliard so‘mgacha bo‘lgan biznesmenlar kiradi”, – deya qayd etgan mutaxassis.

Davlat rahbarining tadbirkorlar bilan uchrashuvi oldidan tarmoqda tashviqot va ma’muriyatga yaqin kanallar tomonidan uchrashuvda “bomba yangiliklar” bo‘lishi haqida qator sizdirgilar yangradi. To‘g‘risi, juda ko‘p foydalanuvchilar, xususan, men ham ortiq darajada umidlarga berildik.

Masalan, individual soliq imtiyozlari va preferensiyalarning butkul bekor qilinishi va barcha uchun teng imkoniyatlar davri boshlanishi e’lon qilinishini kutdim men. Chunki sog‘lom raqobat muhitini buzayotgan ham, soliq yukini oshirayotgan ham, byudjet difitsitini shuncha urinishlarga qaramay kamaytirishga imkon bermayotgan ham aslida o‘sha yaramas imtiyozlar bo‘lib qolmoqda.

Yana bir umid proteksionizm siyosatidan voz kechilishini aytilishi bilan bog‘liq edi. Iqtisodiy o‘sish, farovonlikni oshishini sekinlashtirayotgan, biznesni global taqsimot va nisbiy afzalliklar imkoniyatlaridan mahrum qilayotgan proteksionizm ziyonlari borasida yo savol aytiladi yoki yangi tezislar ochiqlanadi, degan orzu-hayollar yo‘q emasdi.

Biznes rivoji uchun davlatning ixchamlashtirish masalasi juda muhim. O‘zbekistonda davlatning iqtisodiyotga aralashuvi haddan ziyod. Budjet-soliqda ham, biznesda ulushi mavjudligida ham va regulyatsiyada ham. Afsuski, davlat ham katta o‘yinchi, ham katta hakam, ham katta taqsimlovchi. Shu mavzu ham ko‘tarilishi va signallar kerak edi, nazarimda.

Lekin biznes miqyosiga qarab tabaqalashtirilgan yondashuvlarning e’lon qilinishi juda muhim qadam bo‘ldi. Albatta, hali to‘liq tafsilotlarini bilish uchun mexanizmlar ochiqlanishi kerak. Nima bo‘lganda ham biznesning bosqichma-bosqich o‘sishi, o‘sishdan to‘xtab qolmasligi uchun bu qadamlar katta rag‘bat bo‘lishi aniq. Chunki endi o‘sish jazolanmaydi, mukofotlanadi.

Otabek Bakirov, iqtisodchi.