Актёр, қизиқчи Зокир Очилдиев «Shok.uz» YouTube каналига берган интервьюсида «Ҳандалак» жамоасининг пул сабаб бўлиниб кетгани ҳақида тарқалган миш-мишларга аниқлик киритди ва қизиқчиликка қандай кириб келгани, гуруҳнинг номини ким топгани, тўйларда ҳазили оқибатида жанжалларга дуч келиши, қандай инсонларнинг тўйига бормаслиги ҳақида гапирди.
«Ҳандалак» кулги жамоаси пул сабаб бўлиниб кетдими?
«Ҳамма нарсани ҳам пул ҳал қилавермайди. Агар биз Ортиқ Султонов билан бирга ижод қилсак, ҳозир топаётган пулимизнинг камида икки, бўлмаса уч бараварини топамиз. Пул биз бирлашсак кўпаяди, ажрашсак эмас. Пул учун ажрашиб кетди дейилган гап-сўзлар ёлғон. Алоҳида ижод қиляпти дегани гуруҳ ажрашиб кетди дегани эмас. Бир йилдан ошди. Ҳозир Ортиқ Султонов Самарқандда яшайди, ўша ерда, Самарқанд шаҳри маданият бўлимида ишлаяпти. Бир кун келиб балки яна бирга ижод қилармиз, лекин ҳар куни телефонда гаплашиб турамиз», — дейди қизиқчи.
Зокир Очилдиев қизиқчиликка қандай кириб келгани ҳақида
«Қизиқчиликка қизиқиш билан кириб келганман. Ўзбекистонда хизмат кўрсатган артист марҳум Рустам қизиқ Ҳамроқулов, Наманганнинг Поп шаҳридан бўлган, Искандар, Самандар Ҳамроқуловларнинг отаси, у инсонни магнит лентада қизиқ-қизиқ ҳангомалари тарқалган. Мактабда ўқиб юрган пайтларим шуни эшитиб қизиқиб қолганман, 5 ёки 6-синф эдим. Шунда қизиқиб у инсоннинг қизиқ шеърларини, латифаларини ёдлаб олар эдим. Кейин шуни олдимда одам бўлса, бўлмаса юрган йўлимда айтиб юрганман.
Ўртоқларимга айтиб берганман, мақсад кулдириш эмас, ёд олган нарсамни айтиб бериш бўлган. Шундан кейин ўртоқларим устозларга мен ҳақимда айтган, кейин улар мени мактабдаги тадбирларга чиқаришар эди. Ҳаяжон бўларди, шу билан бирга масъулият ҳам, бироқ олдин ҳаяжон ҳозиргига қараганда кам эди, билмадим, балки олдин масъулият кам бўлгандир. Ўқиган сари, билган сари сўзнинг масъулияти ортар экан», — дейди актёр.
«Ҳандалак» номини ким топгани ва гуруҳнинг ташкил топиши ҳақида
«Гуруҳнинг номини мен қўйганман. ‘Ҳандалак’ кўрсатувини Самарқандда, вилоят телеканалларида намойиш этиб бошлаганмиз. Кўрсатув қилишни бошламоқчи бўлганимизда, гуруҳга ном топиш керак бўлган. Мен икки-учта ном топиб борганман, шундан ‘Ҳандалак’ номи маъқул бўлган. ‘Бир гапим бор, уч тиллo’, ‘Дўст бедона’, ‘Ҳазил шоу’, ‘Кулги шоу’ каби номлар ҳам бор эди, бироқ энг маъқули шу бўлган. ‘Ҳандалак’ жарангдор бўлган, ҳам миллий эди. Ҳандалак кирган хонадонга қувонч киради, болалар қувонади, унга қўшилиб катталар ҳам хурсанд бўлади. Кейин ҳандалак полиз меваларидан биринчи пишадиганларидан бири», — дейди Зокир Очилдиев.
Қизиқчи тўйларда ҳазили сабаб жанжалларга дуч келганми?
«Бунақа ҳолатлар ҳам бўлиб туради. Тўйда бир хил инсонлар ичиб олади ва кейин тўғри ҳазилни ўзига буриб ‘нам тортадиган’лари ҳам бўлади. Бўлган, кам бўлса ҳам унақа ҳолатлар учраб туради, бошқача тус бериб юборади. Яхшилаб тушунтириб берамиз, маъноси унақа деб айтамиз», — дейди қизиқчи.
Зокир Очилдиев қандай инсонларнинг тўйига бормаслиги ҳақида
«Баъзи бир одамлар бор, қанча берса ҳам тўйига бормайман. Пулни хоҳлаганимизча беради, лекин одамни менсимай гаплашади, ерга уради. Худди сотиб олгандек муомала қилса, пулим бўлмаса ҳам ориятим бор, чидаб туролмайман. Шунинг учун ҳам бормайман. Масалан, шунақа ҳурматни жойига қўймаган ёки меҳрсиз инсон оёғимни тагига қўй сўйса ҳам бормайман. Меҳр бўлса, таом ёки бошқа нарса муҳим эмас, суҳбат ёки давра учун ҳам бораверамиз», — дейди актёр.
Мавзуга доир: Instagram: Туркия ўрмонида адашиб қолган актрисалар, Зокир Очилдиев ўғлининг тўйидаги юлдузлар ёғдуси.
Изоҳ (0)