Aktyor, qiziqchi Zokir Ochildiyev “Shok.uz” YouTube kanaliga bergan intervyusida “Handalak” jamoasining pul sabab bo‘linib ketgani haqida tarqalgan mish-mishlarga aniqlik kiritdi va qiziqchilikka qanday kirib kelgani, guruhning nomini kim topgani, to‘ylarda hazili oqibatida janjallarga duch kelishi, qanday insonlarning to‘yiga bormasligi haqida gapirdi.
“Handalak” kulgi jamoasi pul sabab bo‘linib ketdimi?
“Hamma narsani ham pul hal qilavermaydi. Agar biz Ortiq Sultonov bilan birga ijod qilsak, hozir topayotgan pulimizning kamida ikki, bo‘lmasa uch baravarini topamiz. Pul biz birlashsak ko‘payadi, ajrashsak emas. Pul uchun ajrashib ketdi deyilgan gap-so‘zlar yolg‘on. Alohida ijod qilyapti degani guruh ajrashib ketdi degani emas. Bir yildan oshdi. Hozir Ortiq Sultonov Samarqandda yashaydi, o‘sha yerda, Samarqand shahri madaniyat bo‘limida ishlayapti. Bir kun kelib balki yana birga ijod qilarmiz, lekin har kuni telefonda gaplashib turamiz”, — deydi qiziqchi.
Zokir Ochildiyev qiziqchilikka qanday kirib kelgani haqida
“Qiziqchilikka qiziqish bilan kirib kelganman. O‘zbekistonda xizmat ko‘rsatgan artist marhum Rustam qiziq Hamroqulov, Namanganning Pop shahridan bo‘lgan, Iskandar, Samandar Hamroqulovlarning otasi, u insonni magnit lentada qiziq-qiziq hangomalari tarqalgan. Maktabda o‘qib yurgan paytlarim shuni eshitib qiziqib qolganman, 5 yoki 6-sinf edim. Shunda qiziqib u insonning qiziq she’rlarini, latifalarini yodlab olar edim. Keyin shuni oldimda odam bo‘lsa, bo‘lmasa yurgan yo‘limda aytib yurganman.
O‘rtoqlarimga aytib berganman, maqsad kuldirish emas, yod olgan narsamni aytib berish bo‘lgan. Shundan keyin o‘rtoqlarim ustozlarga men haqimda aytgan, keyin ular meni maktabdagi tadbirlarga chiqarishar edi. Hayajon bo‘lardi, shu bilan birga mas’uliyat ham, biroq oldin hayajon hozirgiga qaraganda kam edi, bilmadim, balki oldin mas’uliyat kam bo‘lgandir. O‘qigan sari, bilgan sari so‘zning mas’uliyati ortar ekan”, — deydi aktyor.
“Handalak” nomini kim topgani va guruhning tashkil topishi haqida
“Guruhning nomini men qo‘yganman. ‘Handalak’ ko‘rsatuvini Samarqandda, viloyat telekanallarida namoyish etib boshlaganmiz. Ko‘rsatuv qilishni boshlamoqchi bo‘lganimizda, guruhga nom topish kerak bo‘lgan. Men ikki-uchta nom topib borganman, shundan ‘Handalak’ nomi ma’qul bo‘lgan. ‘Bir gapim bor, uch tillo’, ‘Do‘st bedona’, ‘Hazil shou’, ‘Kulgi shou’ kabi nomlar ham bor edi, biroq eng ma’quli shu bo‘lgan. ‘Handalak’ jarangdor bo‘lgan, ham milliy edi. Handalak kirgan xonadonga quvonch kiradi, bolalar quvonadi, unga qo‘shilib kattalar ham xursand bo‘ladi. Keyin handalak poliz mevalaridan birinchi pishadiganlaridan biri”, — deydi Zokir Ochildiyev.
Qiziqchi to‘ylarda hazili sabab janjallarga duch kelganmi?
“Bunaqa holatlar ham bo‘lib turadi. To‘yda bir xil insonlar ichib oladi va keyin to‘g‘ri hazilni o‘ziga burib ‘nam tortadigan’lari ham bo‘ladi. Bo‘lgan, kam bo‘lsa ham unaqa holatlar uchrab turadi, boshqacha tus berib yuboradi. Yaxshilab tushuntirib beramiz, ma’nosi unaqa deb aytamiz”, — deydi qiziqchi.
Zokir Ochildiyev qanday insonlarning to‘yiga bormasligi haqida
“Ba’zi bir odamlar bor, qancha bersa ham to‘yiga bormayman. Pulni xohlaganimizcha beradi, lekin odamni mensimay gaplashadi, yerga uradi. Xuddi sotib olgandek muomala qilsa, pulim bo‘lmasa ham oriyatim bor, chidab turolmayman. Shuning uchun ham bormayman. Masalan, shunaqa hurmatni joyiga qo‘ymagan yoki mehrsiz inson oyog‘imni tagiga qo‘y so‘ysa ham bormayman. Mehr bo‘lsa, taom yoki boshqa narsa muhim emas, suhbat yoki davra uchun ham boraveramiz”, — deydi aktyor.
Mavzuga doir: Instagram: Turkiya o‘rmonida adashib qolgan aktrisalar, Zokir Ochildiyev o‘g‘lining to‘yidagi yulduzlar yog‘dusi.
Izoh (0)