ГИ парҳези: Иордания қироличаси Рания ал-Абдулла 45 ёшдан кейин рациондан чиқариб ташлаган маҳсулотлар

Қандай қилиб қиролича Рания 50 ёшида ҳам ўз вазнини сақлаб қолишга муваффақ бўлди? Marie Claire нашри Иордания қироличасининг парҳези ҳақида маълум бўлган нарсалар билан бўлишди.

Иордания қироличаси аллақачон 51 ёшда ва тўрт фарзандли бўлишига қарамай, у доимо бир хил вазнда бўлиб, гўзал қоматини сақлаб келмоқда. Аммо Рания бундай кўринишда қолиш учун қандай парҳезга риоя қилади? Фитнес мутахассиси Намита Найяр Women’s Fitness журналига маълум қилишича, ўз қоматини сақлаб қолиш учун малика спорт билан шуғулланади ва ГИ парҳезига амал қилади.

ГИ парҳези вазн йўқотиш учун машҳур восита бўлиб, у озиқ-овқатларни глисемик индексига қараб таснифлайди. «Глисемик индекс парҳези одамларга вазн йўқотишга ёрдам берадиган машҳур усулдир», — дейди Найяр.

Овқатланиш режаси, шунингдек, паст глисемик индексли парҳез сифатида ҳам танилган, бу озиқ-овқатларнинг қонда шакар даражасига қандай таъсир қилишига қаратилган. Тизим углеводни ўз ичига олган маҳсулотларга 1 дан 100 гача рақамларни белгилайди, бу ҳар бир маҳсулот қонда шакар даражасини қанчалик кўтаришига боғлиқ. Агар озиқ-овқатлар 70 дан ортиқ рақам билан белгиланган бўлса, улар юқори глюкозали, 100 эса соф глюкоза деб таснифланади. Маҳсулотлар рейтинги 56 дан 69 гача мўътадил ёки 55 дан паст бўлса, афзал ҳисобланади. Градация нафақат маҳсулотларнинг ўзини, балки улар қандай тайёрланишини ҳам ҳисобга олади.

Паст глисемик индексли парҳезлар ёғ йўқотишга ёрдам беради, бу вазн ва холестеринни камайтириш билан боғлиқ. Парҳезшунос Жулетта Келлоу шундай изоҳ берди: «Парҳез режаси жуда оддий ва албатта натижа беради. Агар асосий озиқ-овқат гуруҳларидан воз кечмасдан ёки уларнинг истеъмолини кескин чекламасдан, тўғри, соғлом овқатланиб, вазн йўқотиш керак бўлса,  ГИ парҳези айни муддао».

ГИ парҳезида қатъий тақиқлар йўқ, лекин баъзи маҳсулотлар, жумладан нон, макарон маҳсулотлари, қуруқ маҳсулотлар истеъмол қилиш учун тавсия этилмайди. Бу айниқса, метаболик жараён секинлашган ёшга тўғри келади. Маълум қилинишича, қиролича Рания хамирли таомларни рациондан чиқариб ташлаган, нон ва макарон истеъмол қилмайди. Бироқ вақти-вақти билан малика ўзига турли хил ноз-неъматларни тановул қилишга рухсат беради. Қолаверса, қиролича гамбургерларни яхши кўради, дам олиш кунлари егуликни уйда тайёрлашади. Қолган вақтларда гуруч, қовурилган сабзавотлар, қўй гўшти ёки балиқ истеъмол қилади.

Бундан ташқари, қиролича Раниянинг ўзи маълум қилганидек, у қора шоколадни яхши кўради. Бироқ кўплаб парҳезлар ушбу маҳсулотни хавфсиз ширинликлар рўйхатига киритади.

Қирол Абдуллоҳнинг рафиқаси айниқса бодом ва ёнғоқларни яхши кўради,  чекловларга риоя қилган ҳолда, уларни яхши газак деб ҳисоблайди. Дарҳақиқат, вазн йўқотишнинг калити — чеклашдир. Шунингдек, нафақат арзимас озиқ-овқатга оид кўрсатмаларга риоя қилиш, балки соғлом, аммо етарли даражада тўйимли маҳсулотлар ҳажмини чеклаш ҳам муҳимдир.

Маълумки, қиролича Рания ичмайди ва чекмайди. Бу унга ўзини яхши ҳис қилишига ёрдам беради. Малика мунтазам равишда спорт билан шуғулланади. Намита Найярнинг сўзларига кўра, қиролича ўз кунини ёга машғулотлари билан бошлайди, шунингдек, пилатес, аэробика, югуриш ва кикбоксинг билан шуғулланади.