Актриса Дилноза Кубаева «Барон-2. Соғинч» фильмининг ёпиқ премьерасида журналистлар берган қатор саволларга жавоб берди.
«Барон» фильмининг биринчи қисми катта муваффақият қозонди, унинг давоми ҳам аввалгидек машҳурликка эришоладими, деган саволга у қуйидагича жавоб берди.
— Олдиндан гапиришни ёмон кўраман. Режиссёр Рустам Саъдиев мени халққа машҳур қилган. У инсон унча-мунча фильмни суратга олмасликларини яхши биламан. Ҳаммасини вақт кўрсатади. Насиб қилса, режиссёрнинг навбатдаги фильми ҳам яхши кутиб олинади, — дейди актриса.
Дилноза Кубаева нега фильмларда кам суратга тушаётганини қуйидагича изоҳлади.
— Кинолар аввалгидан анча сийраклашиб қолган. Ижодкорлар асосан сериал суратга олишмоқда. Аста-секин энди кино соҳасида ҳам одимлаш бошланяпти. Бир йил ёки олти ой аввал кастинг топширган устоз санъаткорларнинг ёрдамчилари қўнғироқ қилиб, бири сентябрда, бири октябрда съёмкаларни бошлашларини маълум қилишди. Кинодаги сокинликка шунчалик ўрганиб қолган эканманки, бу гапларни эшитиб, бирдан ғалати бўлиб кетдим. Ўн йил аввал кинолар кўплигидан бир кун у жамоа билан, эртаси куни бошқаси билан ишлардик. Орада спектаклларга ҳам улгурардик. Аммо бир неча йиллик сокинлик сабаб «съёмка бошланади» деган гап мени ваҳимага солиб қўйди. Олдингдан оққан сувнинг қадри йўқ, дейишгани шу бўлса керак. Кинода ҳам бир лойқаланиш бўлди. Унинг қачон тинишини қўл қовуштириб кутиб ўтирмадим-да, орзуйим армон бўлмасин деб, муаллифлик қўшиқларимни ижро этдим. Айримлар ўйлаганидек актрисаликдан кетмайман. Агар одамлар тўйларда хонанда бўлишимни исташса, албатта, бораман. Бу тирикчилик, асосийси, савияни ушлаш керак, — дейди актриса.
Актриса журналистнинг «Хизмат кўрсатган артист унвонини ололмаётганингизга ранжимайсизми?» деган саволига қуйидагича жавоб берди.
— Агар аллада азиз, тўрвада майиз бўлиб, халқимнинг севимли актрисаси бўлмаганимда, бу савол ич-этимни ерди. Аммо севимли эканлигим унвон торозисини тенг ушлаб туради. Аввало, юртимни севаман ва унвон учун ижод қилмайман. Асосийси, одамлар мени яхши кўради ва вақти-вақти билан яхши роллар насиб қилиб турибди, — дейди Дилноза Кубаева.
Яқин ойларга қадар актриса ижтимоий тармоқлардан умуман фойдаланмасди. Унинг бир неча йиллик принципларини ўзгартиришига нима сабаб бўлгани ҳақида қизиқдик.
— Ижтимоий тармоқларда сохта Дилноза Кубаевалар кўпайиб кетди. Ҳаттоки улар фирибгарлик йўли билан одамлардан менинг номимдан пул ундиришган вазиятлар ҳам бўлди. Менга қўнғироқ қилиб, «Онамни табриклаш учун 300 000 сўм пул олгандингиз, биз АҚШдан сизни кузатамиз», деб алоқага чиқишганида ҳайрон қолдим. Ундан кейин бухоролик ҳамюртларимиз қўнғироқ қилиб, «Ўғлимнинг тўйини олиб боришга келишгандик-ку», дейишди. Хуллас, акам билан ўйлаб, эндиликда ижтимоий тармоқлардан фойдаланиш зарурлигини тушундик. Ҳозир ҳам ижтимоий тармоғимни тўлиқ ўзим юритмайман. Ёрдамчим ва ака-укаларим кўмаклашишади, — дейди актриса Дилноза Кубаева.
Мавзуга доир:
- «Барон-2. Соғинч». Рустам Саъдиевнинг соғлиғини йўқотишига сабаб бўлган фильмнинг ёпиқ тақдимотидан репортаж (фото ва видео)
- «Аёлим Дилноза Кубаевага ўхшасин, аммо актриса бўлмасин». Ёш актёр Темур Кубаев машҳур опанинг укаси бўлиш масъулияти ҳақида
- « ‘Осмондаги болалар-3 да суратга тушмоқчиман». Дилноза Кубаева актрисаликни тарк этиб, хонандалик қилмоқчилиги ҳақидаги миш-мишларга изоҳ берди (видео)
Изоҳ (0)