Туркия Россиядан нефть импортини икки баравар оширди

Ғарбнинг Россияга қарши санкциялари туфайли Туркия жорий йилда Россия нефти импортини икки баравар оширди. Бу ҳақда Reuters хабар бермоқда.

Шундай қилиб, мамлакат жорий йилда Россиядан хом ашё импортини, жумладан, Urals ва Sibir Light’ни ўтган йилги 98 минг баррелга нисбатан кунига 200 минг баррелдан кўпроққа оширди.

Refinitiv Eikon маълумотларига кўра, Туркиянинг Tüpraş нефтни қайта ишлаш заводлари ва Star нефтни қайта ишлаш заводи жорий йилда Россиянинг Urals ва Sibir Light нефтини сотиб олишни сезиларли даражада оширди.

Йил бошидан бери Star 48 минг баррелга нисбатан кунига тахминан 90 минг баррель, Tüpraş эса ўтган йилги 45 минг баррелга нисбатан қарийб 111 минг баррель Россия хом ашёсини сотиб олди.

2022 йилнинг биринчи ярмида Россия Туркия маҳсулот импорт қилувчи давлатлар орасида биринчи ўринни эгаллади.

Январь—июнь ойларида мамлакатга 27,7 млрд долларлик (мамлакат умумий импортининг 16 фоизи) Россия товарлари етказиб берилди.

Хитойдан импорт 20,1 млрд долларни ташкил этди. Россиядан Туркия импортининг 60 фоиздан ортиғи нефть ва газдир.

Аввалроқ Туркияда 1 миллиард долларлик нефть топилгани ҳақида хабар берилганди.