Ёғли терини парвариш қилиш қийин, ёғ туфайли юз терисининг ялтираши эса бўяниш жараёнини мураккаблаштиради. Маълум бўлишича, тери генетика билан бир қаторда, турли сабабларга кўра ёғланиши мумкин. «Новий очаг» нашри юз териси ёғланишининг сабабларини маълум қилди.
Гормонал номутаносиблик
Гормонал номутаносиблик теридаги ёғ безларининг ҳаддан ташқари фаоллашишига олиб келиши мумкин, бу эса кўпроқ ёғ ҳосил бўлишига сабаб бўлади. Одатда у терини инфекциялардан ҳимоя қилишга ва суюқлик мувозанатини сақлашга ёрдам бериши керак, лекин агар у жуда кўп бўлса, терида ёғ миқдори ортади. Гормонал мувозанат контрацептив воситалар, нотўғри овқатланиш, жуда кўп ёки жуда кам жисмоний машқлар, ҳомиладорлик ёки менопауза сабаб бузлиши мумкин. Ёғли терига қўшимча равишда гормонал мувозанат бузилганининг бошқа белгилари сезилса, гинеколог-эндокринолог билан маслаҳатлашиш зарур.
Рационда сут маҳсулотларининг кўплиги
Сут маҳсулотлари аёллар учун жуда фойдали: йиллар давомида кальций миқдори камайиб боради ва сут маҳсулотлари етишмовчиликни тўлдиришга ёрдам беради. Аммо сўнгги пайтларда тери одатдагидан кўра ёғли бўлиб қолган бўлса, сут, пишлоқ ва творог истеъмолини камайтириш лозим, чунки уларнинг ортиқчаси терининг ёғланишига олиб келиши мумкин.
Нотўғри парвариш
Ёғли терига ҳам қуруқ теридан кам бўлмаган суюқлик керак. Шунинг учун косметик воситаларни тўғри танлаш муҳимдир. Жуда ёғли ва оғир намловчи восита фойда бермайди, таркибида ёғлар бўлмаган енгилроқ маҳсулотларни танлаш тавсия этилади.
Витамин қўшимчалари
Шифокорлар витамин қўшимчаларини буюришда эҳтиёткор бўлади, чунки Б комплексли қўшимчалар терининг ҳолатига салбий таъсир кўрсатиши мумкин. Жумладан, бу ёғ миқдорининг кўпайишига ва ҳуснбузар тошишига олиб келади.
Стресс
Инсон стрессни бошдан кечирганида, қон оқимига кортизол гормонининг юқори дозалари чиқарилади, бу бошқа нарсалар қаторида терининг ҳолатига таъсир қилади: у ёғ ишлаб чиқаришни кўпайтиради, натижада юзда турли тошмалар пайдо бўлади.
Нотўғри макияж
Нотўғри макияж юз териси тешикларини ёпиб қўяди. Муаммоли терига эга аёллар кўпинча камчиликларни яшириш умидида жуда оғир, қалин макияж воситаларидан фойдаланади. Бироқ таъсир аксинча бўлиши мумкин: қалин макияж фақат ёғнинг қўшимча ишлаб чиқаришини рағбатлантиради ва тиқилиб қолган тешиклар туфайли яллиғланиш ўчоқлари пайдо бўлиши мумкин.
Суюқлик етишмаслиги
Бу ғалати туйилиши мумкин, аммо инсон қанча кам сув ичса, тери шунчалик ёғланади ва организм намлик етишмаслигини ёғ ишлаб чиқаришни кўпайтириш билан қоплашга ҳаракат қилади.
Изоҳ (0)