Кечагина ювилган сочлар бир кун ҳам ўтмай тоза ва порлоқ кўринишини йўқотади. Бу ҳолат кўпчиликка таниш бўлса керак. «Новий очаг» нашри сочларнинг уч-тўрт кун мобайнида тоза кўринишини йўқотмаслигига ёрдам берадиган бир нечта тавсиялар билан бўлишди.
Қуруқ шампунь
Албатта, бу восита соч илдизларини ёғдан тўлиқ тозалай олмайди, лекин сочда ювилгандек таъсирни яратади ва бу бутун кун давомида тоза кўриниш билан таъминлайди. Қолаверса, қуруқ шампунь тоза сочларга хос ҳажмни қайтаради. Ёғли бош териси эгалари учун ушбу восита ҳар доим қўл келиши шубҳасиз.
Қуруқ шампунни ишлатиш жуда осон. Соч маълум қисмларга ажратилади ва илдизига қуруқ шампунь сепилади. 5-7 дақиқа кутилади ва сочлар катта тишли ёғоч тароқ билан таралади. Жараён тугагандан сўнг сочни қўллар ёрдамида тараб юбориш керак.
Иссиқ сув ва фен
Сочни бир неча кун давомида тоза сақлаш учун уларни иссиқ эмас, балки илиқ ёки ҳатто совуқ сув билан ювиш лозим. Ҳақиқат шундаки, юқори ҳарорат ёғ безларининг секрециясини рағбатлантиради ва ювиш таъсирини йўққа чиқаради. Бошни сочиқ билан ўраб юриш тавсия этилмайди — бу сочни тозаликдан маҳрум қилади. Фақат уларни тоза мато билан артиб, табиий равишда қуритиш керак.
Сочни фен билан қуритиш ҳам тавсия этилмайди. Агар бусиз иложи бўлмаса, ҳароратни пасайтириш керак, чунки иссиқ ҳаво ҳам ёғ безларига худди иссиқ сув каби таъсир қилади.
Ёстиқ жилди
Кир бўлган ёстиқ жилди соч турмаги ҳамда тозалигини йўқотишининг асосий сабабларидан биридир. Албатта, ҳар куни уларни ўзгартириб бўлмайди, лекин буни камида 1-2 ҳафтада бир марта бажаришга ҳаракат қилиш лозим. Тоза ёстиқ жилди ҳам сочларнинг ёғини ўзига сингдириб олади ва сочлар узоқроқ вақт давомида порлоқ кўринишини йўқотмайди.
Сочларга тегиниш одати
Кун давомида сочларга жуда ҳам кўп тегиниш одати деярли барчада мавжуд. Аммо қўлдаги кир, микроб ва бошқа нарсалар тўғридан-тўғри сочларга ёпишади ва толаларда фаол равишда кўпайишни бошлайди. Шунинг учун имкон қадар сочларга ортиқча тегмаслик тавсия этилади.
Тароқ ва чўткалар
Агар мунтазам фойдаланиладиган тароққа микроскоп билан қаралса, унда йиғилган бактерияларни кўриб ҳайратда қолиш ҳеч гап эмас. Энг ёмони, сочларни тараш орқали барчаси толалар орасида ёпишиб қолишидир. Шундан сўнг соч қисқа муддат ичида ўзининг ювилган кўринишини йўқотади. Шунинг учун соч тароқларини доимий равишда ювиб, тоза сақлаш керак.
Қолаверса, ёғоч тароқлар ёғ безларининг секрециясини ўзлаштиради, аммо пластик тароқлар уларни сиртда сақлайди.
Ёқимсиз ҳид
Ювилмаган сочлар нафақат тартибсиз кўринади, балки ёмон ҳидга ҳам эга бўлади. Соч учун махсус спрей ёрдамида бу муаммодан халос бўлиш мумкин. Соч спрейлари ёқимли ифор билан бирга сочларга порлоқ кўриниш ҳам беради. Шунингдек, лимон шарбатини илдизларга суртиб, сочларга ёқимли цитрус ҳидини бериш ҳам мумкин.
Тўғри турмаклаш
Агар сочлар тоза кўринишини йўқотган ва ювиш учун вақт қолмаган бўлса, нам сочлар кўринишидаги соч турмагидан фойдаланиш мумкин. Турмакловчи кўпигини бутун узунлик бўйлаб ёйиб, қисмларга ажратиб, махсус қурилма билан қуритиш керак. Нам кўринишидаги жингалак сочлар сизни муаммодан халос этади.
Изоҳ (0)