Ҳеч кимга сир эмаски, мавсумга қараб, макияж техникаси сезиларли даражада фарқ қилиши мумкин. Баъзи маҳсулотлар совуқдагина яхши, лекин иссиқ ойларда, аксинча, улар нафақат ўз функцияларини бажаради, балки терига жиддий зарар етказиши ҳам мумкин. Marie Claire нашри ёзги макияжларда кўпроқ йўл қўйиладиган хатолар ҳақда сўз юритди.
SPF ҳимоясининг етишмаслиги
Эҳтимол, қизларнинг «Мен ёзда бўянмайман, юзим дам олади» каби ёндашувга риоя қилиши ҳам асосий хатодир. Юқори ҳимояга эга SPF кремидан фойдаланишни унутмаслик лозим. Ёзда ультрабинафша нурлари терининг ҳолатига кўпроқ салбий таъсир кўрсатиши мумкин: мавсум охирида юз териси қурийди ва сувсизланади, энг ёмони, турли хил доғлар ҳам пайдо бўлади.
Замонавий ББ кремлари ҳам терини қуёш нурларидан ҳимоя қилувчи ингредиэнтларни ўз ичига олади. Бу орқали бир ўқ билан икки қуённи уриш мумкин: ҳам юз текисланади, ҳам териси ҳимояланади.
Макияж учун тайёрлаш босқичига эътибор бермаслик
Кўпгина қизлар ёзда макияждан олдин юзни тўғри тайёрлаш шарт эмас деб ҳисоблайди: «Юзга бир килограмм косметика нимага керак? Шунчаки упа суртаман, етади», — дейди ўзларига.
Бироқ бундай вазиятда макияжнинг тартибсиз кўриниши хавфи юқори. Тональ крем қуруқ терига сингимайди, ёғли терида эса ялтираб қолади. Агар бошиданоқ ҳаммаси пучга чиқишини хоҳламасангиз, юзни макияж учун тайёрланг.
Ўта қалин макияж
Ёзги макияжда терининг соғлиғига зарар етказиши мумкин бўлган аниқ хатолардан бири ҳам шу. Иссиқ кунларда тери учун оғир бўлмаган ёрқин макияжда ББ ва CC кремларидан фойдаланиш тавсия этилади.
Тери камчиликларини қоплайдиган муаммоли жойларда консилерни меъёрда қўллаган маъқул, бунинг натижасида макияж кун давомида янгидек кўринади ва бўялиб кетмайди.
Бундан ташқари, табиий рангдан анча қуюқроқ бўлган тональ кремни ишлатмаслик керак. Акс ҳолда ранглар орасидаги фарқ туфайли макияж гўёки ниқобга ўхшаб қолади ва бу ташқаридан жуда хунук кўринади.
Упа билан ортиқча ишлаш
Кўринишидан, бу ҳам ёзда кўп учрайдиган хато. Ҳароратнинг кўтарилиши туфайли юз териси терлайди, ёғ ажралади ва, албатта, уни упа ёрдамида бартараф этиш мумкин, деб ўйлаш мумкин. Бироқ бир неча сабабларга кўра ушбу танловдан воз кечиш тавсия этилади.
Биринчидан, агар тери одатда ёғ ва тиқилиб қолган тешикларга мойил бўлса, кўп миқдорда упа макияжга қўшимча қатлам қўшади, бу эса вазиятни янада оғирлаштириши мумкин.
Агар юз терисига кўпроқ упа суртилса, термал сув вазиятни сақлаб қолишга ёрдам беради. Кўпинча, косметик брендларда олиб кетиш учун қулай бўлган маҳсулотларни топиш мумкин. Термал сув упанинг юзга таъсирини йўқ қилади, шунингдек, косметика зарраларига кириб, юз терисини қўшимча равишда намлайди, бу иссиқ ёз кунида жуда фойдали.
Узоқ вақт давомида янгиланмайдиган макияж
Албатта, мавсумдан қатъи назар, макияж билан узоқ вақт юриш зарарли, айниқса, ёзда жуда ҳам хавфлидир. Чунки юқори ҳарорат зарарли микроорганизмларнинг кўпайиши учун қулай муҳит саналади. Яна бир камчилик — ёзда терлаш фаоллашиб, узоқ вақт давомида янгиланмаган макияж билан биргаликда терининг соғлиғига таъсир ўтказмай қолмайди.
Изоҳ (0)