Ўзбекистон маҳсулотлар экспортини кескин кўпайтирди

Ўзбекистоннинг ташқи савдо айланмаси 28,1 млрд долларга етди. Бу ҳақда Давлат статистика қўмитаси хабар бермоқда.

Ташқи савдо айланмаси ўтган йилнинг мос даври билан солиштирилганда 6,3 млрд долларга ошган. 

Бунда экспорт 11,3 млрд долларга етган бўлса, импорт 16,8 млрд долларни ташкил қилди. Салбий салдо — 5,5 млрд доллар. 

Ўзбекистоннинг экспорти ўтган йилга нисбатан 3,2 млрд долларга кўпайди. Бунда ўсиш асосан маҳсулотларни сотиш орқали таъминланди. Ўсиш кўрсаткичи 70 фоиздан ошиқ бўлди. 

2021 йилнинг дастлабки етти ойида маҳсулотлар экспорти 5,4 млрд доллар эди. Жорий йилда бу кўрсаткич кескин ошиб 9,3 млрд долларга етди. 

Бир йил ичида хизматлар соҳасида экспорт бўйича 700 млн долларлик ўсиш кузатилиб, 2 млрд долларга етди. 

Мамлакат импорти 2021 йил билан таққосланганда 3,4 млрд долларга ошди. Бунда ўсиш асосан маҳсулотлар сотиб олиш билан юзага келди — 15,4 млрд доллар. Бундан ташқари 1,4 млрд долларлик хизматлар импорт қилинган.