Қозоғистон молия вазири Ерулан Жамаубаев мамлакат Россиянинг Евросиё тараққиёт банкидаги (EТБ) улушининг бир қисмини сотиб олишдан манфаатдор эканини айтди. Бу ҳақда «Коммерсантъ» хабар бермоқда.
Келишув муҳокама қилинаётганига қарамай, харид бўйича якуний қарор ҳали қабул қилинмаган.
EТБ ўз аъзо давлатларининг иқтисодий ўсишига кўмаклашиш мақсадида ташкил этилган халқаро ташкилотдир. Унга Арманистон, Беларусь, Қозоғистон, Қирғизистон, Россия ва Тожикистон аъзолари киради.
Банк устав капиталида Россия 66 фоиз, Қозоғистон 33 фоиз, Беларусь 1 фоиз улушига эга, бошқа мамлакатларнинг улуши бундан ҳам камроқ.
Умуман олганда, шундай риторика бор, биз буни инкор этмаймиз. Бу, албатта, иш муҳитида муҳокама қилинади. Аммо ҳозирча якуний қарор йўқ, чунки ҳаммаси қандай улуш таклиф қилинишига, бу молиявий нуқтаи назардан қанчалик қиммат бўлишига боғлиқ, — деди Жамаубаев.
Унинг аниқлик киритишича, EТБ ҳозир барқарор ишламоқда ва банк санкциялар босимидан деярли зарар кўрмаган.
Ҳозирда банк портфелининг 36 фоизи Қозоғистон, 39 фоизи Россия, 23 фоизи Беларусь ҳиссасига тўғри келади. EТБнинг портфели 4,4 млрд долларни ташкил этади.
Изоҳ (0)