Қашқадарё вилоятининг Қарши шаҳрида яшовчи фуқаро тери заводидан чиқаётган бадбўй ҳиддан норози бўлиб, устига бензин сепиб ёқиб юборгани ҳақида хабар берилганди. Вилоят Экология бошқармасининг маълумот беришича, тери заводи бундан аввал ҳам аҳоли норозилигига сабаб бўлиб келган.
Қарши шаҳридаги «Қарши Leather» МЧЖ шаклидаги хорижий корхонада экология ходимлари томонидан мунтазам равишда табиатни муҳофаза қилиш ва табиий ресурслардан оқилона фойдаланишга оид қонун ҳамда норматив ҳуқуқий ҳужжатлар талаблари ижросини таъминлаш юзасидан ўрганиш ишлари олиб борилган. Жумладан, ўрганишлар натижасида 2021 йилнинг март ойида Иқтисодий суднинг ҳал қилув қарори асосида корхонага киритилган даъво аризаси бўйича ўтказилган ўрганишларда заводнинг атроф муҳитни ифлослантирганлиги аниқланган. Вазирлар Маҳкамасининг 2018 йил 11 октябрдаги «Табиатни муҳофаза қилишни таъминлашнинг иқтисодий механизмларини янада такомиллаштириш чора-тадбирлари тўғрисида»ги қарорига асосан корхонага 284 миллион сўм миқдорида мажбурий компенсация тўловларини тўлаш мабурияти юклатилган.Вилоят Экология бошқармасининг маълумот беришича, аҳоли норозилигига сабаб бўлган корхона фаолиятини вақтинча тўхтатиш бўйича судга ариза киритилган.Берилган экологик экспертиза хулосаси талабларининг бажарилиши, ифлослантирувчи моддаларни меъёр даражасидан юқори чиққанлиги ва ўрнатилган талабларига риоя этилмаганлиги бўйича аниқланган камчиликлар, атроф табиий муҳитни ифлослантирганлик учун кейинги ўрганишларда 346 миллион сўм миқдорида маъмурий компенсация тўлови ҳам ҳисобланган, — дейилади бошқарма ахборотида.
2021 йил ноябрь ойида вилоят Экология бошқармаси томонидан Иқтисодий судга мазкур корхона фаолиятидаги камчиликлар бартараф этилгунга қадар, вақтинча фаолиятини тўхтатиш бўйича ариза киритилган. Хорижий корхона раҳбарининг 2022 йил март ойида вилоят Экология бошқармасига юборган хатида корхона Хитой давлат инвесторлари томонидан 2022 йил 1 март кунидан номаълум муддатга тўхтатилганлиги, корхона сувларини канализация қувурига қўйиш бўйича бирор бир тўсиқ ва тақиқлар бўлса улар томонидан киритилган инвестиция маблағларини олиб чиқиб кетиш ҳамда корхона фаолиятини бутунлай тўхтатилиши маълум қилинган. Шунингдек, корхона иш фаолиятини қайта тиклаш учун Қарши шаҳар канализация қувурининг ғарбий нуқтасига чиқинди оқова сувлари қуйилиши кераклиги айтилган, — дейди бошқарма мутасаддилари.Вилоят Экология бошқармаси корхона аҳоли яшовчи ҳудудга яқин жойга чиқинди тўккани учун вилоят ҳокимлиги, вилоят ИИБ бошчилигидаги масъуллар ҳудудни тозалаб, айни кунда ҳудудга спорт майдончалари қурилганини билдирган.
Юқоридаги хабар бўйича вилоят Экология бошқармаси масъуллари тадбиркорлик субъектини ўрганиш бўйича ваколатли органлардан тегишли рухсатномалар олиб, ваколати доирасида тезкор ўрганишлар ўтказади. Ўрганиш якунлари бўйича қўшимча ахборот берилади, — дейилади бошқарма ахборотида.
Изоҳ (0)