15 август куни Давлат экология қўмитаси томонидан 20 август—Тадбиркорлар куни муносабати билан тадбиркорлар учун очиқ мулоқот ташкил этилди. Бу ҳақда қўмита ахборот хизмати хабар қилди.
Қайд этилишича, тадбирда Давлат экология қўмитаси раиси Нарзулла Обломурадов мамлакатимизда тадбиркорларни қўллаб-қувватлаш, уларнинг фаолият юритишлари учун қулай шарт-шароитлар ва бизнес муҳитни яратишга катта эътибор қаратилаётганини алоҳида таъкидлаган.
Давлат экология қўмитаси ҳам бир қатор йўналишларда тадбиркорларга хизмат кўрсатиб келмоқда ва бу жараёнда тадбиркорларга ҳар томонлама қулайлик яратиш борасида чора-тадбирлар амалга оширилмоқда. Хусусан, онлайн экспертиза тизими жорий этилган, тадбиркорларга атроф-муҳитга таъсирни баҳолаш ва экологик экспертиза жараёни тўлиқ рақамлаштирилиб, хизмат кўрсатиш тўлиқ электрон форматга ўтказилган, ариза беришдан бошлаб, экспертиза хулосасини расмийлаштиришгача бўлган жараён электрон шаклда амалга ошириш йўлга қўйилган.
Атроф муҳит ифлослантирилганлиги ва чиқиндилар жойлаштирилгани учун компенсация тўловларини хисоблаш бўйича «Эко калкулятор» хизмати жорий этилиб, барча ҳисоботлар электрон тартибда тақдим этилмоқда.
«Экорухсат» ахборот тизими жорий этилиб, бугунги кунда соҳадаги барча 8 та рухсат этиш хусусиятига эга бўлган ҳужжатларни расмийлаштириш тўлиқ рақамлаштирилган ва контактсиз шаклда хизмат кўрсатишга ўтилган.
Изоҳ (0)