Жиззахда тез ёрдам машинасида уйига сув ташиган ҳайдовчи ишдан олинди

Жиззах вилоятининг Арнасой туманида хизмат машинасида уйига сув ташиган тез ёрдам ҳайдовчиси ишдан олинди. Бу ҳақда ССВ матбуот хизмати хабар берди.

Ижтимоий тармоқларда Damas тез тиббий ёрдам машинасига ичимлик суви тўлдирилган идишлар ортилаётгани акс этган видеолавҳа тарқалганди. Жиззах вилояти соғлиқни сақлаш бошқармаси томонидан олиб борилган тезкор ўрганишлар натижасида ушбу тасвирдаги Damas Жиззах вилояти Арнасой туманида жойлашган 2-сон оилавий поликлиникага бириктирилган тез тиббий ёрдам хизматига қарашли автотранспорт экани аниқланган.

Ҳайдовчи Ж.Ш. 1 август куни навбатчилигида оилавий поликлиникадан унча узоқ бўлмаган яшаш хонадонига ўзига бириктирилган тез ёрдам машинасида сув олиб борган. У ичимлик сувини поликлиника олдидаги водопровод кранидан олаётган вақтда бинога ўрнатилган видеокамера тасвирига тушган.

Ушбу ҳолат юзасидан олиб борилган ўрганишлар якунида ўз хизмат вазифасига совуққонлик билан қараган Ж.Ш. лавозимидан озод этилган.

Шунингдек, ижтимоий тармоқларда бир гуруҳ одамлар ёнилғиси тугаб қолган Damas’ни ҳаракатга келтиришга уринаётгани акс этган видеолавҳа ҳам тарқалганди. Тасвир ортидаги овоз эгаси томонидан бу машина Зомин тумани тез ёрдам хизматига тегишли эканлиги айтилган.

Вазирлик хабарида айтилишича, суриштирув ва ўрганишлар давомида видеотасвирдаги Damas’нинг Зомин тумани тез тиббий ёрдам хизматига алоқаси йўқлиги аниқланган. Бугунги кунда туманда 16 та тез тиббий ёрдам машинаси бўлиб, барчасининг олд қисмига «Амбуланс» ёзуви туширилган. Тарқалган видеотасвирдаги Damas’да «Амбуланс» ёзуви мавжуд эмаслиги ҳам буни тасдиқлайди.