Фарғона вилоятининг Марғилон шаҳрида сохта ДХХ ходими қўлга олинди. Бу ҳақда ЎзА хабар берди.
Маълум қилинишича, у вилоятдаги туманлардан бирининг халқ таълими бўлими мудири У.Р. дан товламачилик йўли билан пул олаётганида ушланган.
Шаҳардаги умумий ўрта таълим мактабларидан бирининг директор ўринбосари бўлган Т.I. ўзини туман халқ таълими бўлими мудири У.Р.га ДХХ вилоят бошқармаси масъул ходими сифатида таништириб, унинг устидан ариза тушганини маълум қилган.
Бўлим мудири ҳар ойда мактаб директорларидан пул талаб қилиб келаётганини, яқинда юқори лавозимга қўйилган аёлдан катта миқдорда пора олганини исботловчи аудио ва видео ёзувлар борлигини айтиб, уни жавобгарликдан қутқариб қолиш эвазига 15 миллион сўм талаб қилган.
ДХХ Фарғона вилояти бошқармаси ва Иқтисодий жиноятларга қарши курашиш департаменти вилоят бошқармаси ходимлари билан ўтказилган тадбирда Т.I. кўрсатиб ўтилган миқдордаги пулни олаётган вақтида далилий ашё билан қўлга олинган.
Қайд этилишича, ҳолат юзасидан Т.I.га нисбатан Жиноят кодексининг 165-моддаси (товламачилик) 1-қисми билан жиноят иши қўзғатилиб, тергов ҳаракатлари ўтказилмоқда.
Изоҳ (0)