Британиянинг радиотехник разведка ва радиоэлектрон кураш бўйича RC-135 самолёти Россия давлат чегарасини бузиб кирди. Бу ҳақда Россия Мудофаа вазирлиги маълум қилди, деб ёзади Meduza.
Ҳодиса Баренц денгизи ва Оқ денгизни ажратиб турувчи Кола ярим оролининг шарқий қирғоғидаги Святой нос бурни яқинида содир бўлган.
«Давлат чегарасининг бузилиши олдини олиш учун Ҳаво ҳужумига қарши мудофаа кучлари бўйича навбатчилар таркибидан МиГ-31БМ қирувчи самолёти сафарбар қилинди», — дея маълум қилди Мудофаа вазирлиги.
Россия қирувчиси Британия разведкачи самолётини Россия ҳудудидан ташқарига «сиқиб чиқарди», дея қўшиб қўйди вазирлик.
2021 йил июнида Россия Мудофаа вазирлиги Британиянинг Defender эсминеци Қримдаги Фиолент бурни яқинида Россия чегарасини бузганини маълум қилганди. Эсминец йўналишида огоҳлантирувчи ўт очилган ва «огоҳлантириш сифатида бомба ташланган», шундан кейин у Россия ҳудудий сувларини тарк этган. Буюк Британия эса кема Россия чегарасини бузгани ва унга қарата бомбалар ташланганини рад этганди.
Изоҳ (0)