Россия қўшинлари Украинанинг Херсон шаҳрини тарк этмоқда

Россия ҳарбий қўмондонлиги ўзлари босиб олган Херсон шаҳрида Днепр дарёсининг ўнг қирғоғидан чап қирғоғидан силжимоқда, шу тариқа, улар шаҳарни тарк этмоқда. Бу ҳақда Украина қуролли кучлари Қуруқлик қўшинларининг «Жануб» тезкор қўмондонлиги вакили Наталья Гуменюк Media Centre Ukraine’да бўлиб ўтган брифингда маълум қилди, деб ёзади Meduza.

«Шундай фактлар қайд этилдики, истилочи қўшинлар қўмондонлик пунктларига зарбаларимиз берилганидан кейин, уларнинг жамоа таркиби хавфсизроқ ҳудудга ўтиш усулларидан кесилиб қолмаслик учун жуда катта тезликда ‘кўприк орти’ йўналишида, яъни чап қирғоққа силжимоқда», — деди Гуменюк.

Аввалроқ Россия қўшинлари Херсондан кетиши ҳақида украиналик мансабдорлар маълум қилганди. 13 август куни Николаев вилояти раҳбари Виталий Ким Россиянинг Херсондаги гуруҳининг «бутун таркиби Днепр ортига кўчаётгани» ҳақида ёзганди. 15 август куни Херсон вилояти кенгаши раҳбарининг биринчи ўринбосари Юрий Соболевский Россия ҳарбий қўмондонлиги «ҳақиқатан ҳам Херсонни тарк этгани»ни айтганди. «Уларнинг кўпчилиги аллақачон Херсондан жўнаб кетди, бу ҳақда ҳам маълумотлар бор», — деди Соболевский.

Херсон вилоятида Днепрдан ўтувчи жами учта кўприк бор, булар Херсон ташқарисидаги Антонов кўприги, ундан 6 км масофада жойлашган темир йўл кўприги ва яна 50 км наридаги Кахов сув омбори дамбаси.

Сўнгги ҳафталарда Украина қуролли кучлари бир неча марта Американинг HIMARS қурилмалари орқали Антонов кўпригини ўққа тутди, мақсад уни Россия қўшинларини жойлаштириш учун яроқсиз ҳолатга келтириш эди. 14 август куни Наталья Гуменюк Украина армияси кўприкка яна бир марта зарба бериб, уни тамоман ўтиб бўлмас ҳолатга келтирган.

Июль охирида Украина кучлари Антонов кўприги яқинидаги темир йўл кўпригини ҳаракатланиш учун яроқсиз ҳолатга келтирганини маълум қилганди. 13 август куни эса Кахов сув омбори дамбаси устидан ўтган кўприк ишдан чиқарилган.

Британия ҳарбий разведкаси 13 август куни эълон қилган маълумотида Херсон вилоятида Днепрнинг ғарбий қирғоғидаги «бир неча минг» Россия қўшинларининг қуруқлик орқали таъминланиши «деярли шубҳасиз» фақат понтон (вақтинчалик кўприкларни сувда кўтариб туриш учун хизмат қиладиган қайиқ) паромларга боғлиқ эканини маълум қилганди.