15 август куни Саудия Арабистонининг Жидда шаҳрида Ўзбекистон инвестициялар ва ташқи савдо вазири Жамшид Хўжаевнинг Саудия Арабистони инвестициялар вазири Холид ал-Фалиҳ билан учрашуви бўлиб ўтди. Бу ҳақда «Дунё» ахборот агентлиги хабар қилди.
Маълум қилинишича, суҳбат давомида Ўзбекистон президенти Шавкат Мирзиёевнинг мамлакатга бўладиган давлат ташрифига биргаликда тайёргарлик кўриш масалалари муҳокама қилинган.
Томонлар савдо-иқтисодий ва маданий-гуманитар ҳамкорлик соҳасидаги аниқ лойиҳаларни назарда тутган ҳолда олий даражадаги ташрифнинг кун тартибини иқтисодий жиҳатдан бойитишни батафсил кўриб чиққан. Бундан ташқари, Ўзбекистонга қўшимча Саудия Арабистони инвестицияларини жалб қилиш масалалари муҳокама қилинган. Янги қўшма лойиҳаларни амалга оширишда яқин ҳамкорлик қилишга ўзаро тайёрлик билдирилган.
Ўзаро муносабатларни фаоллаштириш бўйича мавжуд имкониятлар таҳлили натижаларига кўра, кутилаётган олий даражадаги ташриф мамлакатлар ўртасидаги ҳамкорликни сифат жиҳатидан янги даражага олиб чиқишига ишонч билдирилган.
Эслатиб ўтамиз, Шавкат Мирзиёев Саудия Арабистони подшоҳи Салмон бин Абдулазиз Ол Сауднинг таклифига биноан 17–18 август кунлари шу мамлакатга ташриф буюради.
Изоҳ (0)