Жорий йил 17—18 август кунлари Тошкентда Ўзбекистоннинг Шанхай ҳамкорлик ташкилотига раислиги доирасида ташкилотга аъзо давлатлар ички ишлар ва жамоат хавфсизлиги вазирларининг тўртинчи кенгаши бўлиб ўтиши режалаштирилган. Бу ҳақда Марказий Осиё халқаро институти маълумотига таяниб «Дунё» ахборот агентлиги хабар қилди.
Қайд этилишича, кенгашда ШҲТга аъзо давлатларнинг ички ишлар ва жамоат хавфсизлиги вазирликлари, кузатувчи давлатлар ва халқаро ташкилотлар, жумладан, ИНТERPОЛ, БМТнинг Наркотик ва жиноятларга қарши курашиш бошқармаси, МДҲга аъзо давлатлар ҳудудида уюшган жиноятчилик ва бошқа хавфли жиноятларга қарши курашишни мувофиқлаштириш бюроси ҳамда МДҲнинг Аксилтеррор маркази делегациялари қатнашади.
Кенгаш кун тартибига кўра, халқаро ва минтақавий хавфсизликни таъминлаш жараёнида ҳамкорликни ривожлантириш, гиёҳвандлик воситалари ва психотроп моддаларнинг ноқонуний айланмаси, терроризм, экстремизм ва сепаратизм ҳамда трансмиллий уюшган жиноятчиликка қарши курашиш ва бошқа масалалар муҳокама этилади.
Тадбир жараёнида делегация раҳбарларининг халқаро ҳамкорликни такомиллаштиришга бағишланган икки томонлама учрашувлари ҳам режалаштирилган.
Изоҳ (0)