Ижтимоий тармоқларида Фарғонада жанжаллар уясига айланиб қолган норасмий тилло бозори ҳақида хабарлар тарқалди. Фарғона вилояти Ички ишлар бошқармаси ҳолатга муносабат билдирди.
Ўрганишлар натижасида маълум бўлишича, Фарғона шаҳар Бозорбоши ва Саноат кўчалари кесишмасидаги пиёдалар йўлаги икки четида 10 га яқин заргарлик дўконлари қўйилган. Шу жой яқинида «Файзли Фарғона Баҳори» МЧЖга қарашли ошхона фаолият олиб боради. Ошхонанинг Бозорбоши кўчаси томонидан кириш чиқиш эшиги зинасининг ўнг томонида 2 та кўчма заргарлик дўкони қўйилган. Ушбу ошхона ва дўкон эгалари дўконни бошқа жойга кўчириш масаласида мунтазам тортишиб келишган.
Жорий йилнинг февраль ойида ҳам ошхона ва заргарлик дўкони эгалари ўртасида оғзаки жанжал келиб чиққани сабабли профилактика инспекторлари томонидан 6 нафар шахсга нисбатан Маъмурий жавобгарлик тўғрисидаги кодекснинг 183-моддаси (майда безорилик) тартибида ҳужжатлар расмийлаштирилиб, тўпланган ҳужжатлар Фарғона шаҳар судига юборилган.
Жорий йилнинг 10 август куни вилоят ИИБга фуқаро А.Г. мурожаат қилиб, юқоридаги манзилда Т.М., С.К. исмли шахслар унга тегишли савдо дўконини ўзбошимчалик билан бузиб юбораётгани сабабли қонуний чора кўришни сўраган. Чақирувга асосан профилактика инспектори ҳодиса жойига етиб бориб, ҳолат юзасидан тегишли тартибда ҳужжатлар расмийлаштирилган. Етказилган зарарни аниқлаш мақсадида баҳолаш экспертизаси тайинланган.
Ҳозирда мазкур ҳолат юзасидан терговга қадар текширув ҳаракатлари олиб борилмоқда.
Изоҳ (0)