Мбаппе ва Неймар ўртасидаги муносабат кескинлашмоқда. Kilian «ПСЖ»дан бразилияликни сотиб юборишни сўраган

«ПСЖ» ҳужумчиси Kilian Мбаппе жамоа Неймарни сотиб юборишини хоҳламоқда.

Журналист Ромен Молинанинг хабар қилишича, франциялик ҳужумчи клуб раҳбариятидан Неймарни сотиб юборишни сўраган.

Get French Football News ҳам бу маълумотларни тасдиқлади. Қайд этилишича, Kilianнинг вакиллари футболчи жамоа билан янги шартнома имзолаганидан бери бразилиялик футболчини кетказишни сўраб келмоқда.

Футболчилар ўртасидаги муносабат тобора кескинлашмоқда, уларнинг дўстлиги аввалгидек мустаҳкам эмас. Бироқ парижликларнинг янги устози Кристофер Гальтье Неймарнинг қолишини истамоқда.

Лига 1 доирасида «Монпелье»га қарши кечган баҳсда (5:2) Неймар ва Мбаппе пенальти ижро этиш масаласида бир тўхтамга кела олмаган. Бу вазият ижтимоий тармоқларда муҳокамага сабаб бўлмоқда.

Эслатиб ўтамиз, ўтган мавсум давомида «Реал»га ўтиши деярли аниқлиги айтилган Мбаппе охир-оқибат «ПСЖ»да қолишини маълум қилганди. Айрим хабарларда Париж клуби унга катта ваъдалар бергани, хусусан, клуб фаолиятида Мбаппенинг фикрлари инобатга олиниши айтилганди.