Афғонистон собиқ президенти Ашраф Ғани бир йил аввал «Толибон» ҳаракатига мамлакат президентини хўрлаб, уни янги ҳукуматни қонунийлаштирувчи ҳужжатларни имзолашга мажбурлаш имкониятини қолдирмаслик учун Афғонистондан қочиб кетганини маълум қилди, деб ёзади «РБК». Бу ҳақда у CNN телеканалига берган интервьюсида гапириб берди.
«Менинг кетишимнинг сабаби шундан иборат эдики, мен толибларга ва уларнинг тарафдорларига Афғонистон президентини яна бир марта камситиш ва уни ҳукуматнинг қонунийлиги тўғрисидаги ҳужжатни имзолашга мажбурлаш лаззатини бергим келмади. Мен ҳеч қачон қўрқмаганман», — деди у.
Собиқ президент сўзларига кўра, дастлаб унда Афғонистонни тарк этиш режаси бўлмаган. Шунингдек, Ғани журналистнинг ўзи билан паспорт ва катта миқдорда пул олиб кетгани ҳақидаги саволига рад жавоби берди.
2020 йил февралида АҚШ ва «Толибон» Доҳада битим имзолади. Вашингтон 2021 йил 1 майгача Афғонистон ҳудудидан барча қўшинларини олиб кетишга ваъда берди. «Толибон», ўз навбатида, Афғонистон ҳудудидан АҚШ ва унинг иттифоқдошлари хавфсизлигига таҳдид солувчи ҳаракатлар учун фойдаланмаслигини кафолатлади.
Мамлакатдаги вазият 2020 йил июлида, АҚШ ва НАТО қўшинлари Афғонистондан муддатидан аввал олиб кетилиши эълон қилинганидан кейин кескинлашди. Америкаликлар Афғонистонни 11 сентябрда тарк этиши режалаштирилган эди, бироқ «Толибон» ҳукумат қўшинлари назорати остидаги ҳудудларни шиддат билан босиб ола бошлади.
2021 йил августи ўрталарига келиб, толиблар Афғонистонда ҳокимиятни ўз қўлига олди. Мамлакат президенти Ашраф Ғани БААга қочиб кетди. «Толибон» ўз ҳукуматини тузиб, Афғонистонда ислом амирлигини қайта тиклаш режаларини эълон қилди. Ўша йили октябрда Афғонистон муваққат ҳукуматидаги ташқи ишлар вазири Амирхон Муттакий «Толибон» ўз ҳокимияти халқаро ҳамжамият томонидан қонуний деб топилиши учун барча шартларни бажарганлигини маълум қилди.
Аввалроқ Ғани Конституция асосидаги президент экани ва Афғонистон халқи қонуний асосда ҳокимиятни бошқа бировга топширмагунича, президент бўлиб қолишини маълум қилганди.
Мавзуга доир:
Изоҳ (0)