Afg‘oniston sobiq prezidenti Ashraf G‘ani mamlakatdan qochib ketishi sabablarini aytdi

Afg‘oniston sobiq prezidenti Ashraf G‘ani bir yil avval “Tolibon” harakatiga mamlakat prezidentini xo‘rlab, uni yangi hukumatni qonuniylashtiruvchi hujjatlarni imzolashga majburlash imkoniyatini qoldirmaslik uchun Afg‘onistondan qochib ketganini ma’lum qildi, deb yozadi “RBK”. Bu haqda u CNN telekanaliga bergan intervyusida gapirib berdi.

“Mening ketishimning sababi shundan iborat ediki, men toliblarga va ularning tarafdorlariga Afg‘oniston prezidentini yana bir marta kamsitish va uni hukumatning qonuniyligi to‘g‘risidagi hujjatni imzolashga majburlash lazzatini bergim kelmadi. Men hech qachon qo‘rqmaganman”, — dedi u.

Sobiq prezident so‘zlariga ko‘ra, dastlab unda Afg‘onistonni tark etish rejasi bo‘lmagan. Shuningdek, G‘ani jurnalistning o‘zi bilan pasport va katta miqdorda pul olib ketgani haqidagi savoliga rad javobi berdi.

2020-yil fevralida AQSH va “Tolibon” Dohada bitim imzoladi. Vashington 2021-yil 1-maygacha Afg‘oniston hududidan barcha qo‘shinlarini olib ketishga va’da berdi. “Tolibon”, o‘z navbatida, Afg‘oniston hududidan AQSH va uning ittifoqdoshlari xavfsizligiga tahdid soluvchi harakatlar uchun foydalanmasligini kafolatladi.

Mamlakatdagi vaziyat 2020-yil iyulida, AQSH va NATO qo‘shinlari Afg‘onistondan muddatidan avval olib ketilishi e’lon qilinganidan keyin keskinlashdi. Amerikaliklar Afg‘onistonni 11-sentabrda tark etishi rejalashtirilgan edi, biroq “Tolibon” hukumat qo‘shinlari nazorati ostidagi hududlarni shiddat bilan bosib ola boshladi.

2021-yil avgusti o‘rtalariga kelib, toliblar Afg‘onistonda hokimiyatni o‘z qo‘liga oldi. Mamlakat prezidenti Ashraf G‘ani BAAga qochib ketdi. “Tolibon” o‘z hukumatini tuzib, Afg‘onistonda islom amirligini qayta tiklash rejalarini e’lon qildi. O‘sha yili oktabrda Afg‘oniston muvaqqat hukumatidagi tashqi ishlar vaziri Amirxon Muttakiy “Tolibon” o‘z hokimiyati xalqaro hamjamiyat tomonidan qonuniy deb topilishi uchun barcha shartlarni bajarganligini ma’lum qildi.

Avvalroq G‘ani Konstitutsiya asosidagi prezident ekani va Afg‘oniston xalqi qonuniy asosda hokimiyatni boshqa birovga topshirmagunicha, prezident bo‘lib qolishini ma’lum qilgandi.