Бухорода бахтсиз ҳодиса сабаб уч киши вафот этди, бири киши оғир тан жароҳати олди. Бу ҳақда «Дарё» мухбири хабар берди.
Маълум бўлишича, Бухоро шаҳрида яшовчи 3 нафар йигит бир нафар самарқандлик таниши билан Cobalt автомобилида А-380 магистрал йўлининг Қоровулбозор—Когон йўналишида ҳаракатланиб келиб, темир йўлдан юқори тезликда ўтиб, бетон тўсиққа урилган. Воқеа тахминан кечаси 03:30 ларда содир бўлган.
Оқибатда 19, 22 ва 23 ёшли йигитлар воқеа жойида вафот этган. Бир нафар фуқаро эса оғир тан жароҳати олиб, шифохонага ётқизилган.
Вилоят ИИБ ахборот хизмати раҳбарининг билдиришича, ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган ва терговга қадар текширув ҳаракатлари олиб борилмоқда. Суд-тиббий экспертиза тайинланган.
«Ҳолат ҳозирча кимнинг айби билан содир этилгани аниқланмаган. Шу боис, суд қарори чиқмагунча, тўлиқ маълумот бера олмаймиз», —деди вилоят ИИБ ЙҲХБ ахборот хизмати раҳбари, капитан Улуғбек Шукуруллаев.
Изоҳ (0)