Тожикистон 2022 йилнинг биринчи ярмида Ўзбекистонга 17,3 миллион доллар миқдорида 6,6 минг тоннадан ортиқ пахта экспорт қилди. Бу ҳақда Тожикистон божхона хизмати хабар бермоқда.
Қайд этилишича, бу 2021 йилнинг мос даврига нисбатан (5,3 миллион доллар) деярли 3,3 баробар кўп ҳисобланади.
Мамлакатлар ўртасидаги умумий товар айирбошлаш ҳажми 285 миллион доллардан ортиқни ташкил этган. Жумладан, экспорт қарийб 96 миллион доллар, импорт 189 миллион доллардан ортиқ. 2022 йилнинг январь–июнь ойларида Тожикистоннинг Ўзбекистонга экспорт қилинадиган асосий товарлари қуйидагилар бўлди:
- пахта (17,3 миллион доллар);
- цемент (14,1 миллион доллар);
- электр энергияси (12,2 миллион доллар);
- алюминий (10,6 миллион доллар).
Тожикистон Ўзбекистондан асосан минерал ва кимёвий ўғитлар, табиий газ, маиший техника, кийим-кечак ва пойабзал, гилам, ипак маҳсулотлари, помидор, тарвуз ва қовун каби маҳсулотларни олади. 2022 йилнинг июнь ойи охирида «Ўзтўқимачиликсаноат» делегацияси Тожикистонга амалий ташрифи чоғида Хатлон ва Сўғд вилоятлари маҳаллий ҳокимият органлари раҳбарлари билан пахтани қайта ишлаш бўйича қўшма корхона ташкил этиш истиқболларини муҳокама қилган.
Изоҳ (0)