Россия ва Украина Запорожье атом электр станциясини ўққа тутганликда бир-бирини айбламоқда. Бу ҳақда BBC’нинг рус хизмати хабар берди.

Қайд этилишича, АЭСдаги вазият БМТ Хавфсизлик кенгаши фавқулодда йиғилишида муҳокама қилинади. Европадаги энг йирик атом электр станциясидаги вазият БМТни катта ташвишга солмоқда.

Атом энергияси бўйича халқаро агентлик раҳбари Рафаэл Гросси бир неча ҳафтадирки жаҳон ҳамжамиятининг эътиборини мазкур ҳолатга қаратишга ҳаракат қилмоқда.

Запорожье вилояти ҳарбий-фуқаролик маъмурияти бош кенгаши аъзоси Владимир Рогов станция Украина томондан ўққа тутилгани ҳақида, «Украина Энергоатом» компанияси эса Россия қўшинлари томонидан ўққа тутилганини иддао қилмоқда.

Кейинроқ икки томон ҳам атом электр станцияси яқинидаги радиация даражаси меъёрдан ошмаганини маълум қилди.

Таъкидланишича, станцияга жами беш марта зарба берилган.

Россия томони Запорожье АЭСнинг Украина томонидан давомли ўққа тутилиши глобал техноген ҳалокатга олиб келиши мумкинлиги, станция хавф остида тургани ҳақида огоҳлантирди.