Тажрибадаги помидор навлари Бухоронинг жазирама иссиғига бардошлилигини кўрсатмоқда

Қишлоқ хўжалиги вазирлиги ҳузуридаги Сабзавот, полиз экинлари ва картошкачилик илмий-тадқиқот институти олимлари томонидан Бухоро вилоятида ушбу ҳудуднинг тупроқ-иқлим шароитига мос помидор навларини етиштириш бўйича тадқиқот олиб борилди. Вазирлик тажриба-синов жараёнларида эришилган натижалар ҳақида маълумот берди.

Қайд этилишича, «Бобкат Ф1», «Томск Ф1», «Lojain F1», «Red stone», «Сераж Ф1», «Мустақиллик-28», «Rio Grande» каби навлар июль ойининг иссиқ об-ҳаво шароитидан муваффақиятли ўтиб, тажриба-синов жараёнида яхши кўрсаткичларни намоён этмоқда.

Институт олимларининг таъкидлашича, асосий сабзавот экини бўлган помидор салқинсевар ўсимлик бўлгани учун ҳаво ҳарорати +40 даражадан ошса, ўсиш ва ривожланишдан тўхтайди. Кучли иссиқ оқибатида помидор мевасининг айрим қисмларини қуёш уришига, гулларининг тўкилиб кетишига сабаб бўлади. Бу эса помидор сифатининг пасайишига олиб келади.

«Жорий йил Бухоро вилоятининг айрим қисмлари, хусусан Жондор туманида ҳаво ҳароратининг +45-47 даража бўлгани помидор ўсимлигига алоҳида эътибор беришни талаб қилди. Соялатиш мақсадида биз маккажўхорининг қуриган пояси, сомон каби енгил пояли ўсимликлар билан 5 сантиметр қалинликда соялатиб турдик, намликни сақлаш учун эса кечаси суғорилди», – дейди Сабзавотчилик, полиз экинлари ва картошкачилик илмий-тадқиқот институти докторанти Гулшода Саидова.

Эътиборлиси, кучли иссиқдан кейин айрим помидор дурагайлари навларида бўйининг ўсиши, гуллаш каби жараёнлар кузатилмоқда. Ҳозирги кунгача тажриба майдонида помидордан гектарига 45-50 тонна ҳосил олинди. Олимлар кеч кузгача помидор йиғишни мақсад қилишган.

Сабзавот, полиз экинлари ва картошкачилик илмий-тадқиқот институти олимларининг Бухоро вилоятида олиб бораётган изланишлари давомида кучсиз шўрланган тупроқлар шароитида помидор навлар тўпламини ҳар томонлама ўрганиш асосида истиқболлиларини ажратиш, уларни турли суғориш тартиби ва ўғитлаш меъёрларида ўстириш технологиясини такомиллаштириш ишлари олиб борилади.

Мақсад шўрга, иссиққа, қурғоқчиликка чидамли нав танлаш ва уни етиштириш технологиясини ишлаб чиқиш. Шунингдек, келгусида Бухоро вилояти иқлим шароити учун мос нав яратиш.

Ушбу илмий тадқиқотлар 2022—2024 йиллар мобайнида институтнинг Бухоро илмий-тажриба станциясида ўтказилиши мўлжалланган.