Бош прокуратура ҳузуридаги Департамент томонидан ўтказилган тезкор тадбирда Тошкент, Андижон ва Хоразмда ўқишга киритиб қўйиш эвазига пора олган шахслар ушланди.
Департаментнинг Шайхонтоҳур туман бўлими томонидан ДХХ ва ИИББ ходимлари билан ҳамкорликда ўтказилган тезкор тадбирда, Тошкент давлат иқтисодиёт университетнинг кабинет мудири вазифасида ишловчи С.М. фуқаро Ш.ни юқори лавозимда ишловчи танишлари орқали университетнинг 2-мутахассислигига ўқишга киритиб қўйиши эвазига 3 000 долларни олган вақтида ашёвий далиллар билан ушланган.
Шу каби, Андижон шаҳар бўлими томонидан ўтказилган тезкор тадбирда, фуқаро Ш.А. фуқаро Д.ни юқори лавозимда ишловчи танишлари орқали Андижон давлат университетининг сиртқи бўлимига ўқишга киритиб қўйиш эвазига 3 000 долларни олган вақтида ашёвий далиллар билан ушланган.
Департаментнинг Янгиариқ туман бўлими томонидан ДХХнинг Хоразм вилоят бошқармаси билан ўтказилган тезкор тадбирда эса, фуқаро С.И. бошқа бир фуқаро З.ни танишлари орқали Урганч давлат университетига ўқишга киритиб қўйиши эвазига 2 300 долларини олган вақтида ашёвий далиллар билан ушланган.
Хабарда айтилишича, мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан аввал ҳам Хоразм ва Тошкент вилоятларида пул эвазига ўқишни кўчириб бермоқчи бўлган шахслар қўлга тушганди.
Изоҳ (0)