Эстония ўзи томонидан берилган Шенген визаларига эга Россия фуқаролари учун ўз ҳудудига киришни тақиқлайди. Ҳукуматнинг тегишли қарори ҳақида Эстония ташқи ишлар вазири Урмас Рейнсалу маълум қилди, деб ёзади Meduza.
Рейнсалунинг сўзларига кўра, тегишли қоида келаси ҳафта кучга киради. Эстония фуқаролари ва истиқомат гувоҳномаси эгаларининг яқин қариндошлари, дипломатлар ва уларнинг оила аъзолари, шунингдек, транспорт компаниялари ходимлари бундан истисно қилинади.
Шу билан бирга, Шенген келишувининг бошқа мамлакатлари томонидан берилган визалар бўйича кириш мумкин бўлади. Вазир қайд этишича, айни пайтда ҳукумат улар учун ҳам киришни тақиқлаш имкониятини ўрганмоқда.
Рейнсалунинг баёнотида фақат тўғридан-тўғри Россиядан ёки Шенген келишувининг бошқа мамлакатларидан ҳам кириш тақиқланиши масаласи ноаниқ қолган. Амалдаги Шенген қоидалари барча давлатлардан ҳамжамият ичкарисида ҳар қайси мамлакат томонидан берилган амал қилувчи визаси бор одамлар эркин ҳаракатланишини таъминлашни талаб қилади.
Эстония баҳордаёқ, Украинада уруш бошланганидан кейин кўп ўтмай Россия фуқароларига туристик визалар беришни тўхтатганди. Ҳозир визалар фақат Эстония резидентлари қариндошларига ёки гуманитар мақсадларда берилади.
Аввалроқ Эстония Ташқи ишлар вазирлиги Евроиттифоқ даражасида россияликларга виза беришни тўлиқ тақиқлашни муҳокама қилишга чақирган эди. Россияликларга Шенген визалари берилишини тақиқлаш ҳақидаги таклиф Евроиттифоқда муҳокамага қўйилди. Таклиф нафақат сайёҳларга, балки журналистлар, диссидентлар ва Евроиттифоқ мамлакатлари фуқароларининг қариндошларига ҳам виза беришни тақиқлашни ўз ичига олади. Таклиф август охирида Прагада Евроиттифоқ мамлакатлари ташқи ишлар вазирлари учрашувида муҳокама қилинади.
Украина президенти Владимир Зеленский Ғарб мамлакатлари барча россияликларга ўз ҳудудига киришни тақиқлаши кераклигини айтганди. Унинг сўзларига кўра, шу пайтгача Россияга қарши киритилган санкцияларнинг барчаси Россия фуқаролари учун бир йилга чегараларни ёпиш ва Россия ёнилғисини сотиб олишга тўлиқ эмбарго қўйиш олдида «кучсиз» ҳисобланади.
Евроиттифоқнинг баъзи мамлакатлари визалар беришни баҳордаёқ, уруш бошланганидан кейин деярли дарҳол тўхтатган эди. Улар орасида барча Болтиқ давлатлари, Чехия, Словакия, Мальта бор. Польша Россия фуқароларига бевосита Россиядан ёки Беларусдан мамлакатга кириб келишни тақиқлади.
Эслатиб ўтамиз, Латвия Россияни терроризмни қўллаб-қувватловчи мамлакат деб эълон қилди ва Евроиттифоқни россияликларга виза беришни тўхтатишга чақирди.
Изоҳ (0)