Россияликларга Шенген визалари берилишини тақиқлаш ҳақидаги таклиф Евроиттифоқда муҳокамага қўйилди, бу ҳақда Германия ҳукумати расмий вакили Штеффен Хебешрайт маълум қилди, деб ёзади Meduza.
«Лойиҳа Евроиттифоқнинг баъзи мамлакатлари томонидан киритилди ва шу тариқа кун тартибида турибди», — деди Хеберштрайт. Унинг қайд этишича, Германия ҳукумати таклифни эътиборга олган ва ҳозир у бўйича мунозаралар бўлиб ўтмоқда.
Шунингдек, Германия ТИВ аниқлик киритишича, таклиф нафақат сайёҳларга, балки журналистлар, диссидентлар ва Евроиттифоқ мамлакатлари фуқароларининг қариндошларига ҳам виза беришни тақиқлашни ўз ичига олади. У ерда маълум қилинишича, таклиф август охирида Прагада Евроиттифоқ мамлакатлари ташқи ишлар вазирлари учрашувида муҳокама қилинади.
Германия ТИВ вакили бундай тақиқ ҳақидаги мунозараларни «фаразларга асосланган» деб атади.
Россияликлар учун Шенген визаларини тақиқлаш зарурлиги тўғрисидаги мунозаралар июлда фаоллашди, ўшанда Россия ҳукумати қуруқликдаги чегараларни очган ва россияликлар ёппасига Латвия, Эстония ва Финляндия орқали транзит билан Ғарбий Европага жўнаб кета бошлаган эди.
Евроиттифоқнинг баъзи мамлакатлари визалар беришни баҳордаёқ, уруш бошланганидан кейин деярли дарҳол тўхтатган эди. Улар орасида барча Болтиқ давлатлари, Чехия, Словакия, Мальта бор. Польша Россия фуқароларига бевосита Россиядан ёки Беларусдан мамлакатга кириб келишни тақиқлади.
Аввалроқ Еврокомиссия Шенген келишуви қоидалари россияликларга виза беришни тўлиқ тақиқлаш имкониятини кўзда тутмаслигини маълум қилганди.
Украина президенти Владимир Зеленский Ғарб мамлакатлари барча россияликларга ўз ҳудудига киришни тақиқлаши кераклигини айтганди. Унинг сўзларига кўра, шу пайтгача Россияга қарши киритилган санкцияларнинг барчаси Россия фуқаролари учун бир йилга чегараларни ёпиш ва Россия ёнилғисини сотиб олишга тўлиқ эмбарго қўйиш олдида «кучсиз» ҳисобланади.
Изоҳ (0)